జూన్ 2ను నయవంచన దినంగా పాటించాలి : అంబటి రాంబాబు

జూన్ రెండో తేదీని నవ నిర్మాణ దీక్షగా నిర్వహించాలంటూ టీడీపీ అధినేత చంద్రబాబు నాయుడు చేసిన ప్రకటనపై వైకాపా అధికార ప్రతినిధి అంబటి రాంబాబు మండిపడ్డారు. జూన్ 2న 'నవ నిర్మాణ దీక్ష'ను ఉత్సవ దినంగా కాకుండా నయవంచన దినంగా పాటిస్తే బాగుంటుందని ఎద్దేవా చేశారు.

ఇదే అంశంపై ఆయన శనివారం మీడియాతో మాట్లాడుతూ.. ముఖ్యమంత్రిగా చంద్రబాబు చేసిన తొలి సంతకాల్లో ఏ ఒక్కటీ ఇంతవరకు అమలు కాలేదని ఆరోపించారు. చెప్పిన అబద్దం మళ్లీ చెప్పకుండా అబద్దాలు చెబుతూ చంద్రబాబు కాలం గడిపేస్తున్నారని విమర్శించారు. ప్రచారానికి పెద్ద పీట వేస్తున్న చంద్రబాబు... రాష్ట్ర అభివృద్ధిపై దృష్టి సారిస్తే మంచిదని సూచించారు.

ఆంధ్రప్రదేశ్ ముఖ్యమంత్రి చంద్రబాబు నాయుడి యేడాది పాలన వంచనతో సాగిందని ఆరోపించారు. చంద్రబాబు ప్రచారం కోసం ఇచ్చే ప్రాధాన్యం అభివృద్దిపై పెడితే మంచిదని అంబటి రాంబాబు సూచించారు.