తెలంగాణ పౌరులకు సిటిజన్ కార్డులు : కేసీఆర్ ప్లాన్!
తెలంగాణ రాష్ట్ర ప్రజలకు ప్రత్యేకంగా సిటిజన్ కార్డుల పేరుతో గుర్తింపుకార్డులివ్వాలని ముఖ్యమంత్రి కేసీఆర్ నేతృత్వంలోని తెలంగాణా ప్రభుత్వం తీవ్రంగా ఆలోచన చేస్తోంది. అలాగే, ప్రభుత్వ పథకాల లబ్దిదారులను ఎంపిక చేయడం కోసం ఆగస్టులో సామాజిక ఆర్థిక స్థితిగతుల సర్వేను చేయించాలని కూడా నిర్ణయించింది. ఈ సర్వే వల్ల పథకాలు ఎవరికి అమలు చేయాలో తేలుతుందని కేసీఆర్ భావిస్తున్నారు.
ఇళ్లు, రేషన్ కార్డులు లాంటి ప్రభుత్వ పథకాల్లో భారీ స్థాయిలో అవినీతి జరుగుతున్న నేపథ్యంలో ఈ సర్వే ప్రజల సామాజిక, ఆర్థిక స్థితిగతులను తెలుసుకోవడానికి ఉపయోగపడుతుందని భావిస్తున్నారు. ఆ తర్వాత తెలంగాణ పౌరులకు పాన్ కార్డు తరహాలో తెలంగాణ సిటిజన్ కార్డులు ఇస్తామని, ఈ కార్డులు బహుళ ప్రయోజనకార్డులుగా ఉంటాయని కేసీఆర్ కార్యాలయ వర్గాలు పేర్కొంటున్నాయి.
