ఆంధ్రప్రదేశ్‌కు మినీ స్టూడియో: రామోజీ రావు పక్కా ప్లాన్
రామోజీ ఫిల్మ్ సిటీని మరమ్మత్తు చేసే పనిలో ఉన్న రామోజీరావు ఆంధ్రప్రదేశ్ కోసం మినీ స్టూడియోను ఏర్పాటు చేయాలని ప్లాన్ చేస్తున్నట్లు వార్తలు వస్తున్నాయి. రాష్ట్ర విభజన అనంతరం తీవ్రంగా నష్టపోయిన ఆంధ్రప్రదేశ్‌లో మినీ స్టూడియోను తప్పకుండా ఏర్పాటు చేయాలని రామోజీ రావు సర్వం సిద్ధం చేసుకుంటున్నట్లు తెలిసింది.
హైదరాబాదులో 2500 ఎకరాల్లో ఫిల్మ్ సిటీని నిర్మించిన రామోజీ రావు.. స్మాల్ స్కేలులో ఏపీ కోసం స్టూడియోను ఏర్పాటు చేయనున్నట్లు సమాచారం. దీనికి సంబంధించి ఇప్పటికే ఏపీ సీఎం చంద్రబాబు నాయుడు, నిర్మాతలు, ఎగ్జిబిటర్లతో రామోజీ రావు చర్చించారట.
ఏపీలో నిర్మితమయ్యే మినీ రామోజీ స్టూడియోలో థీమ్ పార్కుతో పాటు స్టూడియో ఫెసిలీటీస్ ఉంటాయని, మినీ థియేటర్లను కూడా అందులో ఏర్పాటు చేసేందుకు రంగం సిద్ధమవుతున్నట్లు తెలిసింది. మినీ థియేటర్లు 50-100 సీట్ల కెపాసిటీలతో ఉంటాయని వార్తలొస్తున్నాయి.
