సబ్సిడీ వంట గ్యాస్ సిలిండర్ల సంఖ్య 9కి కుదింపు?
సబ్సిడీ కింద ఇచ్చే వంట గ్యాస్ సిలిండర్ల సంఖ్యను 9కి కుదించాలన్ని యోచనలో కేంద్రంలోని నరేంద్ర మోడీ ప్రభుత్వం ఉన్నట్టు తెలుస్తోంది. ప్రభుత్వ సబ్సిడీ దుర్వినియోగం, గ్యాస్ బ్లాక్ మార్కెటింగ్‌కు అడ్డుకట్ట వేయాలంటే, సబ్సిడీ సిలిండర్ల సంఖ్యను తగ్గించాల్సిందేనని కేంద్ర ఆర్థిక మంత్రిత్వ శాఖ సూచిస్తోంది.
అనుకున్నడే తడవుగా దీనిపై పరిశీలన చేసి అభిప్రాయం చెప్పాలని కేంద్ర పెట్రోలియం మంత్రిత్వ శాఖకు ఆదేశాలు జారీ చేసింది. దీంతో పెట్రోలియం మంత్రిత్వ శాఖ అధికారులు దీనిపై లోతుగా పరిశీలన చేస్తున్నారు. ఇంటికి 9 సబ్సిడీ సిలిండర్ల నిబంధనను సడలించి, 12 కు పెంచాలన్న నాటి యూపీఏ ప్రభుత్వం చర్యతో సిలిండర్ల వినియోగంలో ఒకేసారి 12 శాతం విక్రయాలు పెరిగాయట.
దీంతో సబ్సిడీ అవసరం లేని బడాబాబులు కూడా సబ్సిడీ సిలిండర్లను యథేచ్ఛగా వాడుతున్నారని కేంద్ర ప్రభుత్వం ఓ అంచనాకు వచ్చింది. ఈ నేపథ్యంలో సబ్సిడీ దుర్వినియోగానికి చెక్ పెట్టాలంటే, సబ్సిడీలపై పరిమితి విధించాల్సిందేనని కేంద్రం యోచిస్తోంది. అంటే, సమీప భవిష్యత్తులోనే సబ్సిడీ సిలిండర్ల సంఖ్య 9కి తగ్గిపోవడం ఖాయమని పెట్రోలియం శాఖ అధికారులు చెపుతున్నారు.
