సౌరవ్ గంగూలీ బీజేపీలో చేరట్లేదు: సిద్ధార్థ్ స్పష్టం

టీమిండియా కెప్టెన్, మాజీ క్రికెటర్ సౌరవ్ గంగూలీ బీజేపీలో చేరుతున్నారని వస్తున్న వార్తల్లో ఎలాంటి నిజం లేదని జాతీయ కార్యదర్శి సిద్ధార్థ్ నాథ్ సింగ్ తోసిపుచ్చారు. గంగూలీకి పార్టీ నేతలతో సత్సంబంధాలున్నాయని.. ఆయనంటే తమకెంతో గౌరవమన్నారు.

2008లో రిటైరైన తర్వాత క్రికెట్ వ్యాఖ్యాతగా, బెంగాల్ క్రికెట్ సంఘంలో పనిచేసిన గంగూలీ బీజేపీ అగ్రనాయకత్వంతో సంప్రదింపులు జరుపుతున్నట్టు ఓ ప్రముఖ ఆంగ్ల టీవీ ఛానెల్ పేర్కొన్న విషయం తెలిసిందే. గతేడాది ప్రధాని నరేంద్రమోడీ ప్రతిష్టాత్మక ‘స్వచ్ఛ భారత్’ ప్రాజెక్టుకు గంగూలీతోపాటు మరికొంతమందిని ఎంపిక చేశారు.

ఈ నేపథ్యంలో బీజేపీ అగ్రనేతలతో సౌరవ్ గంగూలీ సంప్రదింపులు జరుపుతున్నారని, తద్వారా గంగూలీ బీజేపీలో చేరుతారని జోరుగా ప్రచారం సాగింది. అయితే ఈ ప్రచారంలో నిజం లేదని బీజేపీ గురువారం స్పష్టం చేసింది.