పాకిస్తాన్ లో సింహం కుటుంబం.. మనుషులతోనే జీవనం
సింహాన్ని ఆంత దూరంలో ఉన్నా చూడాలంటేనే చాలా జాగ్రత్తగా పరిసరాలను గమనించ ఓ లుక్కేస్తాం. మరి అదే సింహం ఇంట్లోనే ఉంటే.. ఒకటి కాదు రెండు.. మరో ఏడు పిల్లలు ఇంట్లోనే ఉంటే అది మనుషులు కాపురం ఉండే ఇల్లా లేక సింహాలు కాపురం ఉంటే గుహనా అనే అనుమానం కలుగుతుందని కదూ.. అవును నిజమే.. కానీ పాకిస్తాన్ లో ఓ వ్యక్తి తన ఇంట్లోనే సింహాలను పెంచుకుంటున్నాడు. వాటితోనే మల్లయుద్ధం చేస్తాడు. వాటితోనే ఆట పాటా ఉంటుంది. ఇంతకీ ఏమిటా విశేషాలు రండీ మనమూ తెలుసుకుందాం.
పాకిస్థాన్‌లోని ముల్తాన్‌ ప్రాంతంలో ఫైజల్ అబ్బాస్ మహి అనే వ్యక్తి ఆఫ్రికా జాతికి చెందిన రాజా అనే మగ సింహం, రాణి అనే ఆడ సింహాన్ని తెచ్చుకున్నాడు. వాటిని పెంపుడు జంతువులుగా తన ఇంటిలోనే పెట్టుకున్నాడు. అప్పుడప్పుడు వాటిని షికారుకు కూడా తీసుకెళ్ళతాడు. అంతకు ముందే రెండు సింహం పిల్లకు జన్మనిచ్చిన రాణి మళ్ళీ మరో ఐదు సింహాలకు జన్మనిచ్చింది.
ఇంతకుముందు జన్మించిన రెండు సింహం పిల్లల వయసు తొమ్మిది నెలలు. ఆ సింహాలను కూడా అతడు ఇంట్లోనే పెంచుకుంటున్నాడు. సాధారణంగా సింహానికి ఒక కాన్పులో రెండు లేదా మూడు మాత్రమే పిల్లలు జన్మిస్తాయి. ఏకంగా ఐదు జన్మించడంతో ఆ ఇంటి సింహం పిల్లలు కుక్క పిల్లలు, పిల్లిపిల్లలు పెరిగినట్లు పెరుగుతున్నాయి. ఇవి ఇల్లంతా తిరుగుతూ సందడి చేస్తున్నాయి.
