న్యూయార్క్ ఫెడరల్ కోర్టు జడ్జిగా సరితా కోమటిరెడ్డి పేరు నామినేట్!
అమెరికాలో మరో ఇండో-అమెరికన్ మహిళకు అత్యున్నత పదవి దక్కనంది. న్యూయార్క్‌లోని ఫెడరల్ కోర్టు జడ్జిగా సరితా కోమటిరెడ్డి పేరును ఆ దేశ అధ్యక్షుడు డోనాల్డ్ ట్రంప్ నామినేట్ చేశారు. ఈ మేరకు సోమవారం యూఎస్ సెనేట్‌లో సరితా పేరును ఆయన ప్రతిపాదన చేశారు. అధ్యక్షుడి ప్రతిపాదనను సెనేట్ ఆమోదముద్ర వేసిన పక్షంలో సరితా కోమటిరెడ్డి న్యూయార్క్ ఫెడరల్ కోర్టు జడ్జిగా బాధ్యతలు స్వీకరిస్తారు.
ప్రస్తుతం ఈమె యూఎస్ అటార్నీ ఆఫీసులో న్యూయార్క్ ఈస్ట్రన్ డిస్ట్రిక్ట్‌కు జనరల్ క్రైమ్స్‌ విభాగానికి డిప్యూటీ చీఫ్‌గా విధులు నిర్వహిస్తున్నారు. కాగా, హార్వర్డ్ లా స్కూల్‌లో గ్రాడ్యుయేట్ పూర్తి చేసిన సరితా కోమటిరెడ్డి.. కొలంబియాలోని యుఎస్ కోర్టు, డిస్ట్రిక్ట్ అపీల్స్‌లో క్లర్కుగా పని చేశారు. త్వరలోనే అత్యున్నత పదవిని అధిరోహించనున్న సరితా కోమటిరెడ్డి సొంతూరు తెలంగాణ. ఈమె తల్లిదండ్రులిద్దరూ వైద్యులే.
