అమెరికా జర్నలిస్టు తల నరికేశారు... వీడియో పోస్ట్ చేశారు...
ఇస్లామిక్ ఉగ్రవాదులు సిరియాలో పేట్రేగిపోయారు. రెండేళ్ళ క్రితం కిడ్నాప్ చేసిన అమెరికా జర్నలిస్ట్ జేమ్స్ పోలీ తలను కిరాతకంగా నరికేసి, ఆ జర్నలిస్టు తల నరకక ముందు ఫొటోని, తల నరికిన తర్వాత ఫొటోలతోపాటు వీడియోను కూడా మీడియాకి పంపారు. ఉగ్రవాదుల హేయమైన చర్య తాలూకు వీడియో యూట్యూబ్‌లో సంచలనం సృష్టిస్తోంది. ఈ ఘాతుకానికి పాల్పడ్డ తీవ్రవాదులు 'అమెరికాకు ఓ సందేశం' అనే వీడియో పోస్ట్ చేశారు.
నారింజ రంగు దుస్తులు ధరించిన ఫోలీని ఓ ఎడారి ప్రాంతంలో మోకాళ్ల మీద నిలబెట్టి, పక్కనే ఓ ఉగ్రవాది తలకు ముసుగు వేసుకుని నల్ల దుస్తుల్లో ఉన్నాడు. సాధారణంగా నారింజ రంగు దుస్తులను అమెరికా సైన్యం అదుపులో ఉండే ఖైదీలకు వేస్తారు. అతడి పక్కనే ఉన్న ఉగ్రవాది ఇంగ్లీషులో మాట్లాడాడు.
ఆ తర్వాత అతడు జేబులోంచి కత్తి తీసి, ఫోలీకి మరణశిక్ష విధిస్తున్నట్లు చెప్పాడు. ఇరాక్ లో ఉన్న ఇస్లామిక్ ఉగ్రవాదులపై వైమానిక దాడులు చేయాలంటూ అమెరికా అధ్యక్షుడు బరాక్ ఒబామా ఆదేశించడంతో అందుకు ప్రతీకారంగా ఈ శిక్ష వేస్తున్నామన్నారు. ఫోలీ కూడా తన చావుకి అమెరికాయే కారణం అని చెప్పినట్టుగా వీడియోలో వుంది.
