అమెరికాలో డ్రై క్లీనింగ్ వ్యాపారం చేస్తున్న ఉత్తర కొరియా నియంత పిన్ని
ఉత్తర కొరియా నియంత అధ్యక్షుడు కిమ్ జోంగ్ ఉన్ పిన్న ప్రస్తుతం అమెరికాలో అజ్ఞాతవాసం గడుపుతోంది. ఆమె కుటుంబ పోషణ కోసం డ్రై క్లీనింగ్ వ్యాపారం చేస్తూ జీవిస్తోంది. అయితే, ఆమె అక్కడ అజ్ఞాతవాసం గడపడానికి గల కారణాలు మాత్రం వెల్లడించలేదు.
ఉత్తర కొరియా మాజీ అధ్యక్షుడు (ప్రస్తుత అధ్యక్షుడి తండ్రి) కిమ్ జోంగ్ - 2 భార్యల్లో ఒకరైన కో యంగ్ హుకు... కో యంగ్ సుక్ అనే సోదరి ఉంది. ఆమె తన భర్త రి గంగ్, ముగ్గురు పిల్లలతో కలసి అమెరికాలో అజ్ఞాత జీవితం గడుపుతోంది.
సాక్షాత్తూ అధ్యక్షుడి పిన్ని అయిన ఆమె కుటుంబపోషణ కోసం డ్రై క్లీనింగ్ వ్యాపారం చేస్తోందని వాషింగ్టన్ పోస్ట్ ప్రత్యేక కథనాన్ని ప్రచురించింది. కిమ్ జోంగ్ ఉన్కు చిన్నప్పుడు బాస్కెట్ బాల్ అంటే చాలా ఇష్టమని, ఆ బాల్ను పక్కన పెట్టుకుని నిద్రపోయేవాడని ఆమె గుర్తు చేసుకున్నారు.
చిన్నప్పటి నుంచి కిమ్ జోంగ్ ఉన్ కు కోపం ఎక్కువ, సహనం తక్కువని ఆమె తెలిపారు. అయితే ఉత్తరకొరియా నుంచి తాను కుటుంబంతో సహా అమెరికాకు ఎందుకు వచ్చారన్న ప్రశ్నకు ఆమె సమాధానం దాటవేశారు. అమెరికాలో ఆమె ఇల్లుకొనుక్కుని స్థిరపడగా, ఆమె పిల్లలు అక్కడే ఉద్యోగాలు చేసుకుంటున్నారు.