'నేను మనిషిని కాదు.. పిల్లిని' అంటున్న ఆ యువతి.. నిజంగానే పిల్లి చేష్టలే.. ఎక్కడ?

ఆమె చూడటానికి అచ్చం మనిషిలాగానే కనిపిస్తుంది. కానీ... ఆమె మాత్రం తాను మనిషిని కాదని చెపుతోంది. పైగా.. తనలో అన్నీ పిల్లి లక్షణాలే ఉన్నట్టు చెప్పడమే కాదు.. అదేవిధంగానే నడుచుకుంటోంది. అంతేనా పిల్లిలాగానే కనబడేందుకు ఆ యువతి కూడా పిల్లి చెవులను తగిలించుకుంది. అప్పుడప్పుడు తోక కూడా తగిలించుకుని పిల్లిలాగే నాలుగు కాళ్లతో నడుస్తుంది. ఇంతకీ ఆ మహిళ ఎక్కడ ఉందో తెలుసా.. నార్వే దేశంలోని ఓస్లో నగరంలో ఉంది. పేరు నానో. వయస్సు 20 యేళ్లు. 

ఈ యువతి అందరిలాగానే ఉంటుంది. మనిషిలాగానే నడవగలుగుతుంది. మాట్లాడగలుగుతుంది. నవ్వగలుగుతుంది. కానీ, తనలో మనిషి లక్షణాలు ఏమాత్రం లేవంటోంది. తానొక పిల్లినని చెబుతోంది. చూడటానికి మనిషిలాగానే కనబడుతున్నా.. తనలో పిల్లి లక్షణాలే అధికమని చెబుతోంది. తనలో ఉన్న పిల్లి లక్షణాలను వివరిస్తూ ఓ ఇంటర్వ్యూ ఇచ్చింది. 

ఇందులో ఆమె చెప్పిన విషయాలను పరిశీలిస్తే...'ఇతర పిల్లుల్లాగానే నాకూ నీళ్లంటే చాలా భయం. నోటితో చేసే చిన్న చిన్న ధ్వనుల ద్వారా భావవ్యక్తీకరణ చేయగలను. నాకూ పాలంటేనే ఎక్కువ ఇష్టం. నేను యుక్త వయస్సు వచ్చే వరకు అందరిలాగానే ఉన్నాను. కానీ, 18 సంవత్సరాల వయసులో తెలిసింది. నేను మనిషిని కాదు.. పిల్లినని. అందుకే నన్ను నేను పిల్లిగానే భావిస్తా'నని చెప్పింది.