గురువారం, 28 మార్చి 2024
  1. వార్తలు
  2. తెలుగు వార్తలు
  3. జాతీయ వార్తలు
Written By PNR
Last Updated : గురువారం, 3 సెప్టెంబరు 2015 (15:37 IST)

పోలీసుల చేతిలో షీనా బోరా డైరీ.. ఇంద్రాణి అమ్మే కాదు.. అదో పెద్ద దెయ్యం..

దేశ వ్యాప్తంగా సంచలనం సృష్టిస్తున్న షీనా బోరా హత్య కేసులో మరో కీలక సాక్ష్యం పోలీసులకు చిక్కింది. తన తల్లి ఇంద్రాణి ముఖర్జియా గురించి షీనా బోరా ఈ డైరీలో అనేక విషయాలను రాసింది. ముఖ్యంగా తమ ఇద్దరి మధ్య ఉన్న సంబంధాల గురించి అందులో రాసినట్టు తెలుస్తోంది. దీంతో ఈ డైరీలోని విషయాల ఆధారంగా ఇంద్రాణి వద్ద మరోమారు ప్రశ్నించాలని పోలీసులు ఓ నిర్ణయానికి వచ్చారు. 
 
ఇంద్రాణి రెండో మాజీ భర్త సంజీవ్ ఖన్నాను కోల్‌కతాలో అరెస్టు చేసిన తర్వాత ఆయన ఇంట్లో పోలీసులు సోదాలు చేశారు. ఆ సమయంలో ఈ డైరీ బయటపడింది. ఇందులో షీనా బోరా తన స్వీయ దస్తూరితో ఈ డైరీని రాసుకున్నట్టు పోలీసులు తేల్చారు. 'నన్ను అన్ని వైపుల నుంచి ఒత్తిడి చుట్టుముట్టింది. ఈ జీవితమే వృథా అన్నట్టుంది. నా తల్లిని నేను ద్వేషిస్తున్నాను. ఆ దుర్మార్గపు తల్లి...., ఆమె అసలు నా అమ్మే కాదు. అదో పెద్ద దెయ్యం...' అని రాసింది. 
 
దశాబ్దకాలం క్రితమే తన తల్లి ఇంద్రాణి గురించి షీలా తన డైరీలో ఇలా ఎందుకు రాసిందనే విషయంపై పోలీసులు ఆరా తీస్తున్నారు. అలాగే, ఫిబ్రవరి 11, 2003 తేదీతో ఉన్న ఎంట్రీలో "ఓహ్... నాకు పుట్టిన రోజు శుభాకాంక్షలు! ఏమీ లేదు... నా భవిష్యత్ అంధకారంగా ఉంది" అని షీనా రాసుకున్నట్టు తెలుస్తోంది. ఇప్పుడీ డైరీని పూర్తిగా విశ్లేషించి, అందులోని వివరాల ప్రకారం మరోసారి ఇంద్రాణిని ప్రశ్నించాలని ముంబై పోలీసులు భావిస్తున్నారు.