శుక్రవారం, 29 మార్చి 2024
  1. వార్తలు
  2. తెలుగు వార్తలు
  3. జాతీయ వార్తలు
Written By Selvi
Last Updated : శనివారం, 13 ఫిబ్రవరి 2016 (11:45 IST)

ట్విట్టర్లో ప్రధాని పొరపాటు.. గనికి విషెస్.. గూగుల్ తప్పేనా? మోడీదా?

ప్రధాన మంత్రి నరేంద్ర మోడీ ట్విట్టర్లో చిన్న పొరపాటు చేశారు. దేశ ప్రధాన మంత్రిగా బాధ్యతలు చేపట్టినప్పటి నుంచీ మోడీ దేశంలోని ప్రముఖులందరికీ ట్విట్టర్ ద్వారా శుభాకాంక్షలు చెబుతున్న సంగతి తెలిసిందే. ఈ క్రమంలో ఆఫ్ఘనిస్తాన్ అధ్యక్షుడు అష్రఫ్ గనికి నిన్న(శుక్రవారం) ట్విట్టర్‌లో పుట్టినరోజు శుభాకాంక్షలు తెలిపారు. వాస్తవానికి గని పుట్టిన రోజు మే 19న కావడం గమనార్హం. అది తెలియకుండా ముందుగానే గనికి మోడీ శుభాకాంక్షలు తెలపడం వివాదాస్పదమైంది. 
 
గూగుల్‌లో గని పుట్టిన రోజు శుక్రవారం అని ఉండటంతోనే మోడీ శుభాకాంక్షలు చెప్పడం జరిగింది. కాగా మోడీ ట్వీటుకు స్పందించిన అష్రఫ్ ముందుగా కృతజ్ఞతలు చెప్పారు. అయితే తన పుట్టిన రోజు ఇవాళ కాదని... మే 19న అని తర్వాత అసలు విషయాన్ని చల్లగా చెప్పారు. ఈ పొరపాటుకు పలువురు సోషల్ మీడియాలో మోడీని విమర్శిస్తే... గూగుల్‌లో ప్రముఖుల పుట్టినరోజు తేదీలను సరిగా అప్ డేట్ చేయడం లేదని మరి కొంతమంది అంటున్నారు. గూగుల్ తప్పిదంతోనే మోడీ ఇలా చేయాల్సి వచ్చిందని పలువురు అభిప్రాయపడుతున్నారు.