బాక్సర్ సరితా దేవికి సచిన్ సపోర్ట్ : కేంద్రానికి లేఖ!
నిషేధానికి గురైన భారత మహిళా బాక్సర్ సరితా దేవికి మాస్టర్ బాస్టర్ సచిన్ టెండూల్కర్ బాసటగా నిలిచారు. ఆసియా క్రీడల్లో పతకం నిరాకరించి సస్పెన్షన్ వేటుకు గురైన ఆమెకు కేంద్రం మద్దతివ్వాలంటూ లేఖ రాశాడు.
క్రీడలు, యువజన వ్యవహారాల మంత్రి సర్బానంద సోనోవాల్కు రాసిన లేఖలో, సరితా దేవి ఇప్పటికే క్షమాపణ చెప్పిందని, ఆమెపై సస్పెన్షన్ను ఎత్తివేసే దిశగా చర్యలు తీసుకోవాలని సచిన్ లేఖలో విజ్ఞప్తి చేశాడు. సరితాదేవికి పూర్తి మద్దతు ఇవ్వాలని, కెరీర్ ప్రమాదంలో పడే పరిస్థితి నుంచి కాపాడాలని సచిన్ కోరాడు.
కాగా, ఆసియా క్రీడల బాక్సింగ్లో ఓ బౌట్లో తనకు అన్యాయం జరిగిందంటూ సరితా దేవి కాంస్య పతకం నిరాకరించడంతో ఆమెపై బాక్సింగ్ ఇండియా సంఘం సస్పెన్షన్ వేటు వేసిన సంగతి తెలిసిందే.