శుక్రవారం, 29 మార్చి 2024
  1. క్రీడలు
  2. ఇతర క్రీడలు
  3. వార్తలు
Written By Selvi
Last Updated : సోమవారం, 30 మార్చి 2015 (16:02 IST)

సైనా నెంబర్ 1: సానియాలా సైనా నెహ్వాల్‌కు గుర్తింపు ఇవ్వాలి!

బ్యాడ్మింటన్ స్టార్ వరల్డ్ నెంబర్‌ వన్‌గా అవతరించిన హైదరాబాదీ షట్లర్ సైనా నెహ్వాల్‌ను రాజ్యసభ సభ్యుడు, కాంగ్రెస్ సీనియర్ నేత వి. హనుమంతరావు అభినందించారు. ప్రపంచ బ్యాడ్మింటన్‌లో టాప్ ర్యాంకు సాధించిన మొదటి భారతీయురాలు సైనా అని కితాబిచ్చారు. ఇప్పుడామె ఘనతపరంగా ఎవరికీ తక్కువ కాదని, టెన్నిస్ క్రీడాకారిణి సానియా మీర్జాకు ఇచ్చిన గౌరవమే సైనాకూ ఇవ్వాలని ఆయన డిమాండ్ చేశారు. తెలంగాణ ప్రభుత్వం సానియా మీర్జాను రాష్ట్రానికి బ్రాండ్ అంబాసడార్‌గా నియమించిన విధంగానే, సైనాకు కూడా గుర్తింపునివ్వాలని అన్నారు. 
 
కాగా,  హైదరాబాద్ స్టార్ క్రీడాకారిణి సైనా నెహ్వాల్.. భారత బ్యాడ్మింటన్ చరిత్రలో కొత్త అధ్యాయాన్ని లిఖించిన సంగతి తెలిసిందే. ఇండియా ఓపెన్ ఫైనల్లోకి దూసుకెళ్లిన సైనా... బీడబ్ల్యూఎఫ్ ర్యాంకింగ్స్‌లోనూ నంబర్‌వన్ స్థానాన్ని సొంతం చేసుకుంది. దీంతో ఈ ఘనత సాధించిన భారత తొలి క్రీడాకారిణిగా చరిత్ర సృష్టించింది. ఈ ర్యాంక్‌ను గురువారం అధికారికంగా ప్రకటిస్తారు. 
 
దిగ్గజ ఆటగాడు ప్రకాశ్ పదుకొనే (1980) తర్వాత మళ్లీ నంబర్‌వన్ ర్యాంక్‌ను దక్కించుకున్నది సైనానే కావడం విశేషం. లండన్ ఒలింపిక్స్‌లో కాంస్యం సాధించిన 25 ఏళ్ల సైనా అంతర్జాతీయ స్థాయిలో 14 టైటిల్స్‌ను సొంతం చేసుకుంది. ఆల్ ఇంగ్లండ్ చాంపియన్‌షిప్‌లో ఫైనల్‌కు చేరిన తొలి భారత మహిళా క్రీడాకారిణిగా కూడా రికార్డు సృష్టించింది.