తెలంగాణ సీఎంకి బ్యాలెట్ బాక్సులో కింగ్ ఫిషర్ బీర్ కోసం లేఖ...
తెలంగాణ ముఖ్యమంత్రి కేసీఆర్‌కు ఓ వెరైటీ విన్నపం అందింది. అది కూడా నేరుగా కేసీఆర్‌కు పంపకుండా బ్యాలెట్ బాక్స్‌లో వేయడం విశేషం. కేసీఆర్‌కు డైరెక్ట్‌గా తన కోరికను విన్నవించుకోవడం కష్టం అనుకున్న ఆ వ్యక్తి ప్రస్తుతం మండల, జిల్లా పరిషత్ ఎన్నికలను తన విజ్ఞప్తిగా వేదికగా చేసుకున్నాడు. జగిత్యాల జిల్లా రాయికల్‌ మండలం మూటపల్లి గ్రామానికి చెందిన బ్యాలెట్ బాక్స్‌ను తెరిచిన అధికారులకు జగిత్యాల జిల్లా వాసుల పేరుతో ఓ లేఖ దొరికింది.
ఆ లేఖ వ్రాసిన అజ్ఞాత వ్యక్తి తమ జిల్లాలో కింగ్‌ఫిషర్‌ బ్రాండ్‌ బీరు దొరకడం లేదని ఆవేదన వ్యక్తం చేసాడు. ఈ బ్రాండ్‌ బీరు కోసం పక్క జిల్లాలకు వెళ్లాల్సి వస్తోందని పేర్కొన్నాడు. తమ మీద దయతలిచి కింగ్‌ఫిషర్‌ బీర్‌ను అందుబాటులో ఉంచాలని కోరాడు. అంతేకాకుండా తన లేఖ చివరలో నోట్‌ అంటూ ప్రత్యేకంగా పెట్టి, కింగ్ ఫిషర్ బీర్ల కోసం జిగిత్యాల జిల్లాను కరీంనగర్‌లో విలీనం చేయాలనే సూచన కూడా చేశాడు ఆ వ్యక్తి. ఇప్పుడా లేఖ సోషల్ మీడియాలో వైరల్‌గా మారింది. మరి దీనిపై కేసీఆర్ స్పందిస్తారో లేదో చూడాలి.
