చిన్నారి అభిమానికి చిరు ఛాన్స్...! 150వ సినిమాలో...!

మెగాస్టార్ చిరంజీవి, తమ్ముడు పవర్ స్టార్ పవన్ కల్యాణ్ బాటలు నటిస్తున్నారు. చిరంజీవి హైదరాబాద్ యం.యన్.జే. క్యాన్సర్ ఆసుపత్రిలో చికిత్స పొందుతున్న తన చిన్నారి అభిమాని బాలుని కలిసి, అతనికి తన 150 చిత్రంలో ఛాన్స్ ఇస్తానని  హామీ ఇచ్చారు.

ఆదిలాబాద్ జిల్లా అడేగామ గ్రామానికి చెందిన బాలుకి క్యాన్సర్ వ్యాధి సోకడంతో గత మూడేళ్లుగా హైదరాబాద్ యం.యన్.జే. క్యాన్సర్ ఆసుపత్రిలో చికిత్స పొందుతున్నాడు. ఒక ప్రముఖ తెలుగు టీవీ ఛానల్ వారు నిర్వహించిన ఒక కార్యక్రమంలో ఆ బాలుడుని, తల్లి తండ్రులని ఇంటర్వ్యూ చేసినప్పుడు బాలు తనకు చిరంజీవిని చూడాలని ఉందని తెలిపాడు. 

ఆ సంగతి తెలుసుకొన్న చిరంజీవి గురువారం స్వయంగా ఆస్పత్రికి వెళ్లి బాలుని కలిసేందుకు కాసేపు ముచ్చటించారు. అంతే కాదు అతనికి కొన్ని బొమ్మలు కూడా బహుకరించారు.

ఆ సందర్భంగా చిరంజీవి ఆ బాలుడితో కొంత సేపు మాట్లాడినప్పుడు అతను చిరంజీవిని “మీరు మీ 150వ సినిమా ఇంకా ఎప్పుడు తీస్తారు?” అని ప్రశ్నించాడు. “మంచి కధ దొరికితే వెంటనే మొదలుపెడతానని” చిరంజీవి చెప్పారు. 

ఈ సందర్భంగా బాలు ఆయనని రెండు కోర్కెలు కోరాడు. ఆయన డ్యాన్స్ చేస్తే చూడాలని ఉందని, అలాగే ఆయన తీయబోయే 150 సినిమాలో తను కూడా కనిపించాలని ఉందని కోరాడు. అందుకు చిరంజీవి ఏ మాత్రం సందేహించకుండా వెంటనే అంగీకరించారు.

“ముందు నువ్వు పూర్తిగా కోలుకుని, ఆసుపత్రి నుండి డిశ్చార్జ్ అయిన తరువాత, పూర్తి ఆరోగ్యంగా తయారయితే ఇద్దరం కలిసి డ్యాన్స్ చేద్దాము. అప్పుడు నా సినిమాలో కూడా నువ్వు కనిపించేలా చేస్తాను. సరేనా?” అని చిరంజీవి చెప్పడంతో బాలు, అతని తల్లి తండ్రులు కూడా ఆనంద పట్టలేకపోయారు. 

బాలు తల్లి పద్మ చిరంజీవి చేతులు పట్టుకొని కళ్ళకు అద్దుకొని మరీ కృతజ్ఞతలు తెలిపారు. ఆయన రాకవలన బాలు ఇంకా వేగంగా కోలుకొంటాడని డాక్టర్లు కూడా చెప్పారు. బాలు తల్లి తండ్రులు, ఆసుపత్రి వైద్య సిబ్బంది అందరూ చిరంజీవికి ఆసుపత్రికి వచ్చి బాలుని పర్మార్శించినందుకు కృతజ్ఞతలు తెలిపారు. బాలు త్వరగా కోలుకొని పూర్తి ఆరోగ్యం సంతరించుకోవాలని తను దేవుడ్ని ప్రార్దిస్తున్నట్లు చిరంజీవి చెప్పారు.