కమల్ సీన్స్ వాడుకున్నాం...
కమల్ నటించిన పుష్పక విమానం గుర్తుండే వుంటుంది. మాటలు లేని ఆ చిత్రం తరహాలో మళ్ళీ ఎవరూ ఆ ప్రయత్నం చేయలేదు. కానీ కొత్త టీమ్ అలాంటి ప్రయత్నమే చేసింది. పైగా కమల్ సినిమాలోని కొన్ని సన్నివేశాలను కూడా ఇందులో వాడుకున్నట్లు చెబుతున్నారు. సందీప్ కుమార్, అనీష్ ఖాన్ హీరోహీరోయిన్లుగా రూపొందుతున్న చిత్రం 'పుష్పక్'. ఈ చిత్రంలో హైదరాబాద్కి చెందిన అజామ్ సఫీ విలన్గా నటిస్తున్నాడు. ఈ చిత్రానికి మైనుఖాన్ దర్శకత్వం వహిస్తుండగా.. 'మదర్ అండ్ ఫాదర్ బ్యానర్స్పై మధుసుధనరావు సమర్పణలో తెరకెక్కుతోంది.
అన్ని కార్యక్రమాలు పూర్తి చేసుకున్న ఈ చిత్రం ఈ నెల 13న విడుదల సిద్ధమవుతోంది. ఈ సందర్భంగా ఏర్పాటు చేసిన మీడియా సమావేశంలో దర్శకుడు మైనుఖాన్ మాట్లాడుతూ..'యూనివర్సల్ స్టార్ కమల్ హాసన్ నటించిన మూకీ చిత్రం 'పుష్పకవిమానం' తర్వాత వస్తున మరో మూకీ చిత్రమిది. కథపరంగా చాలా భిన్నంగా ఉన్నా.. కమల్ హాసన్ సినిమాలోని ఒకటిరెండు సన్నివేశాలను ఇందులో కూడా తీసుకున్నాము. భారతదేశంలోనే అతితక్కువ బడ్జెట్తో తీసిన చిత్రమిది. ఇందులో సందీప్ చాలా బాగా నటించాడు. అలాగే హైదరాబాద్కు చెందిన అజామ్ సఫీ విలన్గా అద్భుతంగా నటించాడు.
కొత్తగా, ప్రయోగాత్మకంగా వస్తున్న మా ఈ చిన్న సినిమాను ప్రేక్షకులు ఆదరిస్తారని కోరుకుంటున్నాను' అని తెలిపారు. హీరో సందీప్ మాట్లాడుతూ.. సస్పెన్స్ థ్రిల్లర్ కథాంశంతో ఈ సినిమా రూపొందింది. నాకిది రెండవ చిత్రం. మా ప్రయత్నాన్ని ఆదరిస్తారని కోరుకుంటున్నాను' అని చెప్పారు. ఎగ్జిక్యూటివ్ ప్రొడ్యూసర్ లియుఖాన్ మాట్లాడుతూ..'ఇందులో రెండు పాటలున్నాయి. మర్డర్ బ్యాక్డ్రాప్లో సాగుతుంది. జనవరిలోనే ఢిల్లీలో విడుదల చేశాం. అక్కడ కంటే ఇక్కడ బాగా ఆదరణ ఉంటుందని భావిస్తున్నామన్నారు. ఇక ఈ సినిమాకు ఫొటోగ్రఫీ: ఆనం వెంకట్, మ్యూజిక్: కె అండ్ ఎమ్. ఎడిటర్: రామకృష్ణ.జి.