సమాజం నుంచే ''కమ్లి'' పుట్టింది: కె.ఎన్.టి.శాస్త్రి
|
ప్రస్తుతం ఆయన తీసిన కమ్లి చిత్రం ఉత్తమ ప్రాంతీయ చిత్రంగా జాతీయ అవార్డుకు ఎంపికయ్యింది. ఈ సందర్భంగా ఆయనతో కాసేపు...
కమ్లి చిత్ర కథ ఎలా పుట్టింది ?
రోజువారీ పేపర్లలో వచ్చే న్యూస్ ఆధారంగానే కమ్లి కథ పుట్టింది. గతంలో నేను హార్వెస్టింగ్ బేబీ గార్ల్స్ అనే డాక్యుమెంటరీ చేశాను. దాదాపు అలాంటిదే ఈ కథ కూడా. లంబాడీలు తమ పిల్లల్ని అమ్ముకోవడమనే దురాచారాన్ని పత్రికల్లో చదివి కలత చెందాను. దాన్ని సినిమాగా మలచాలనే ఆలోచనలోంచే కమ్లి పుట్టింది.
ఈ కథ కోసం తండా ప్రజలను దగ్గరినుంచి పరిశీలించి ఈ కథ తయారు చేశాను. లంబాడీ మహిళల కడుపులో పెరుగుతోంది ఆడ శిశువు అని తెలియగానే కొందరు సేవాసంస్థల పేరుతో వారి వద్దకు వచ్చి వారికి కొంత డబ్బులిస్తారు. ఆ తర్వాత ఆడ శిశువు పుట్టగానే మరికొంత ముట్టజెప్పి బిడ్డను శిశు విహార్కు చేరుస్తారు.
అటుపై దత్తత పేరుతో చట్టపరంగా కార్యక్రమాలు పూర్తిచేసి అరబ్ దేశాలకు అమ్మేస్తారు. ఇలాంటి శిశువులు ఇతర దేశాల్లో పెరిగి పెద్దవారయ్యాక వారిని సెక్స్ వర్కర్లుగా మార్చేస్తారు. ఇలా సాగుతున్న ఈ దురాగతంపై కొంతైనా చైతన్యం తేవడానికే ఈ చిత్రం చేయాలని నిర్ణయించుకున్నాను.
ముందుగా ఈ చిత్రం కోసం ఎవరిని సంప్రదించారు ?
ఈ చిత్రం చేయడానికి ఇండస్ట్రీలో ఎక్కని గడపలేదు, దిగని గడపలేదు. కానీ ఎవరూ ఈ చిత్రం చేయడానికి ముందుకు రాలేదు. ఈ సమయంలో హరిశ్చంద్రప్రసాద్ అనే ప్రవాసాంథ్రుడు అంతకు ముందు నేను తీసిన తిలాదానం చిత్రం చూడాలంటూ అడిగారు. ఆ సందర్భంలో కమ్లి కథ ఆయనకు వినిపించాను. తద్వారా ఈ ప్రాజెక్ట్ కార్యరూపం దాల్చింది.
సహజంగా ఇలాంటి కథలు విన్నప్పడు ఎలాంటి రియాక్షన్ ఉంటుంది ?
చాలామంది ఇలాంటి కథలు విన్నప్పుడు చేస్తాం చూస్తాం అంటారు తప్ప నిజంగా ముందుకు రారు. నా అనుభవం ప్రకారం వీడు గత్యంతరం లేకుండా వచ్చాడని తెలిసిన వెంటనే ఎదుటి వారి ప్రవర్తన మారిపోతుంటుంది.
మొదట్లో కమ్లి చిత్రాన్ని సౌందర్యతో చేయాలనుకున్నారట ?
అవును. 2004లో నేను తీసిన తిలాదానంకు అవార్డు లభించిన సందర్భంలో ఆ కార్యక్రమంలో సౌందర్యను కలవడం జరిగింది. ఆమె ఈ చిత్రంలో నటించడానికి ముందుకు వచ్చారు. ఆ తర్వాత ఈ ప్రాజెక్ట్పై ఆమె కొంత ఖర్చు కూడా పెట్టారు.
అయితే ఆ సమయంలో ఆమెకు మరో చిత్రంలో ఆఫర్ రావడంతో ఈ కథను కొద్దిరోజులు వాయిదా వేయమన్నారు. కానీ అలా చెప్పిన కొద్దిరోజులకే ఆమె మరణించడం జరిగింది. దీంతో కమ్లి ప్రాజెక్ట్ ఆగిపోయింది.
మరి ఈ చిత్రం కోసం నందితాదాస్ను ఎలా ఒప్పించారు ?
ఓ ఫంక్షన్ సందర్భంగా ఆమెను కలవడం జరిగింది. ఆ సమయంలో నా గురించి చెబుతూ కమ్మి కథ గురించి చెప్పాను. అప్పుడు ఈ చిత్రంలో భర్తగా ఎవరు నటిస్తారు అని అడిగింది. ఆ విషయమై ఆలోచిస్తుండగా హిందూ పేపర్లో షపీ ఇంటర్వ్యూ చూడడం జరిగింది. అలా ఈ చిత్రంలో నందితాదాస్ భర్తగా షపీని ఎంపిక చేయడం జరిగింది.
ఇలాంటి చిత్రాల వల్ల నిర్మాతకు లాభమా? నష్టమా ?
చిత్రాన్ని సరిగా తీసుకురాగలిగితే లాభమే. ఇలాంటి చిత్రాన్ని మార్కెట్ చేయడం చాలా కష్టం అనుకుంటారు.ఎందుకంటే ఈ తరహా చిత్రాలని పస్ట్ కాఫీ తీసుకురావడంతోటే తమ పని అయిపోయింది అనుకుంటారు. అటుపై కమర్షియల్ చిత్రంలా పబ్లిసిటీ ఇవ్వరు. దాంతో ఈ చిత్రాలు ప్రజలకు చేరవు.
అయితే ఈ చిత్రాలకు శాటిలైట్ హక్కులు, వివిధ పెస్టివల్స్లో పాల్గొనడం లాంటి వాటివల్ల ఈ చిత్రాలకు రాబడి వస్తుంది. అలాగే ఫిలిం డెవలప్మెంట్ కార్పొరేషన్ కూడా రాయితీలు ఇస్తుంది. అన్నీ సక్రమంగా చేస్తే ఇవన్నీ లాబాలే.
అయితే ఈ చిత్రాన్ని ప్రేక్షకులు చూడకపోయినా అవార్డు ఎలా వచ్చింది ?
ఇక్కడ ప్రేక్షకుల జడ్జిమెంట్ కాదు. అవార్డు కమిటీ నిర్ణయంతో అవార్డు వస్తుంది. ఎందుకంటే వారి దృష్టిలో చిత్రానికి కొన్ని ప్రమాణాలుంటాయి. కథలో సహజత్వం, నటీనటుల ఆహార్యం లాంటి అంశాల ప్రాతిపదికతో అవార్డులు ఇస్తారు. నాలుగు పాటలు, అర్థనగ్న దృశ్యాలు ఉంటేనే చిత్రం అని అనుకోవడం పొరబాటు.
ప్రస్తుతం మీ రాబోయే ప్రాజెక్ట్ ఏంటి ?
'దిల్కుమారి' అనే హిందీ చిత్రం చేయాలనుకుంటున్నాను. కథ కూడా రెడీగా ఉంది. ఈ కథకు నేపాల్ నేపథ్యం. అక్కడ ఆడపిల్లకు మూడేళ్లు రాగానే దేవకన్యగా మార్చే అలవాటు ఉంది. ఆ పిల్ల పెద్దయ్యాక పెళ్లి చేసుకోకూడదు. తల్లితండ్రుల వద్ద ఉండకూడదు. కుమార్ఘర్ అనే చోట ఉండాలి. అలా పెరిగిన అమ్మాయి ఓ వ్యక్తిని ప్రేమిస్తే ఎలా ఉంటుంది అన్న కథాంశంతో ఈ చిత్రం తెరకెక్కనుంది.
ఇటువంటి చిత్రాలు చేయాలనే ఆలోచన ఎలా కలుగుతుంది ?
స్వతహాగా జర్నలిస్టును కాబట్టి సమాజాన్ని పరిశీలనా కోణంలోంచి చూచి చిత్రాలు తీస్తుంటాను. ఇప్పుడు చిత్రాల్లో ఎలాంటి విలువలు లేకుండా పోతున్నాయి. గతంలో వ్యాంపుల పేరుతో చేసే వికారాలన్నీ ప్రస్తుతం హీరోయిన్లే చేసేస్తున్నారు. మన ఇంట్లోని ఆడవాళ్లను అలా కనీసం ఊహించుకోను కూడా లేము. కానీ సినిమాల్లో మాత్రం అలాంటి విషయాలు చూచి ఎంజాయ్ చేస్తుంటాం. ప్రజల్లో ఇలాంటి దృక్పథం మారాలి. హైటెక్ రోజులు వస్తున్నా విలువలు మాత్రం దిగజారి పోతున్నాయి.
