Pavan Kalyan | Jesus | Mother Mary | మేరీ మాత కలలోకి వచ్చింది: పవన్ కల్యాణ్
WD
ఏసుక్రీస్తు.. అంటే భక్తిరస ప్రధాన చిత్రంలో ఎందుకు చేయాలనుకున్నారు..?
ఒకరోజు మా అబ్బాయి పొరపాటున కిందపడిపోయాడు. దాంతో వాడి మోకాలికి గాయం అయింది. వాడు బాధపడుతుంటే ఆ దెబ్బ నాకే తగిలినంత ఫీల్ అయ్యాను. ఎందుకో తెలియదు.. ఆ క్షణంలో మేరీమాత గుర్తుకు వచ్చింది. తన కుమారుడు క్రీస్తును చిత్ర హింసలు పాల్జేస్తుంటే ఆ తల్లి హృదయం ఎంత తల్లడిల్లి ఉంటుందో అనిపించింది.
అలా ఆ రాత్రి ఆ ఆలోచనలతోనే నిద్రపోయా. ఉదయం లేచేసరికి కొండా కృష్ణంరాజుగారు ఏసుక్రీస్తుపై చిత్రాన్ని నిర్మించాలనుకుంటున్నట్లు చెప్పారు. పైగా ఆ చిత్రంలో నన్ను నటించమని అడిగారు. ఇంకేముంది ఆ మేరీమాతే ఈ పనికి సంకల్పించి ఉంటుందని అంగీకరించా.
క్రైస్తవులకు సంబంధించి మీకు ఏమీ తెలియదు. మరి సినిమాలో ఎలా చేస్తారు..?
నా స్కూలు చదువంతా మిషనరీ స్కూల్లోనే సాగింది. నాకు చాలామంది క్రైస్తవ స్నేహితులున్నారు.
కమర్షియల్ హీరోగా ముద్రపడిన మీరు ఆధ్యాత్మిక చిత్రాలవైపు మళ్లడం.. కెరీర్కు ఇబ్బంది కాదా..?
అలాంటిదేమీ ఉండదు. పాత్రలో దమ్ము ఉండాలి. అటువంటి పాత్ర దొరికినపుడు అది ఆధ్యాత్మికమా.. మరొకటా అని చూడను. నచ్చితే చేసేందుకు నేను ఎప్పుడూ సిద్ధమే.
సరే.. ఇపుడు క్రైస్తవులకు సంబంధించి చేస్తున్నారు... భవిష్యత్తులో హిందూ దేవుళ్లకు సంబంధించి ఏదైనా చిత్రంలో నటిస్తారా..?
అలాంటి బేధాలేమీలేవు. మన దేశం అనేక మతాల సమ్మేళనం. అన్ని మతాలు సమానమే. నేను ముందు చెప్పినట్లుగా పాత్ర నచ్చితే నటించడానికి నేను సిద్ధమే.
అసలు ఈ చిత్రాన్ని చేయడం వెనుక ఎవరిదైనా ప్రభావం ఉన్నదా...?
బహుశాః నాకు తెలిసి ఒక సంఘటన నాపై తీవ్రంగా ప్రభావం చూపిందనే చెప్పాలి. ఒరిస్సాలో ఒక వ్యక్తి మతమార్పిడికి పాల్పడుతున్నాడంటూ అతడిని కొందరు హతమార్చారు. ఆ తర్వాత హత్యకు పాల్పడిన వ్యక్తులను పోలీసులు అదుపులోకి తీసుకున్నారు. వారికి శిక్ష పడే తరుణంలో హతుని భార్య వారినందరినీ క్షమిస్తున్నట్లు ప్రకటించి వారిపై పెట్టిన కేసులను ఎత్తివేయాలని అభ్యర్థించింది. నిజంగా ఆ సంఘటన నా జీవితంలో మర్చిపోలేనిది. అంతటి క్షమాగుణం కొందరికే సాధ్యం. వారు భగవంతులతో సమానమే.
ఏసుక్రీస్తు చిత్రంలో మీ పాత్ర ఎటువంటిది..?
ఇది మాత్రం మీరు వెండితెరపై చూడాల్సిందే అని ముగించారు పవన్ కల్యాణ్
