అన్నా చెల్లెళ్ల అనుబంధాన్ని తెరకెక్కించిన మరో చిత్రం గోరింటాకు. రాజశేఖర్, సుజిత, మీరాజాస్మిన్, ఆర్తీ అగర్వాల్, శివాజీ రాజా తదితరులు నటించిన ఈ చిత్రాన్ని దర్శకుడు అంతగా పండించలేకపోయాడు. టెక్నాలజీ మారుతున్న ప్రస్తుత తరుణంలో కూడా సెంటిమెంట్ వున్నా మరీ సీరియల్ను తలపించే తరహాలో సాగే సినిమాను చేయడం నిర్మాతల సాహసమేనని చెప్పాలి. మలయాళంలో సక్సెస్ సాధించిన ఈ చిత్రాన్ని తెలుగులో రీమేక్ చేయడానికి చాలా కాలమే పట్టింది. ఆర్తీ అగర్వాల్ ఒక కారణమైతే, హీరో డేట్లు మరో కారణమైంది.
కథ విషయానికి వస్తే... తల్లిదండ్రులు లేకపోయినా అన్నీ తానై చెల్లలను ఎంతో ప్రాణప్రదంగా చూసుకునే అన్న, అన్న అనురాగాన్ని పొందే చెల్లెలి మధ్య సాగిన రెండున్నర గంటల సన్నివేశాల కలయికే 'గోరింటాకు'. సర్వారాయుడు(రాజశేఖర్), జానకి(సుజిత) ఆ ఊరి ప్రజలను కన్నబిడ్డలుగా చూసుకుంటుంటారు. ఇలా ఊరందరినీ బిడ్డలుగా భావించినవారికి సంతానలేమి సమస్య బాధిస్తుంది. ఓ శుభకార్యంలో జానకి గొడ్రాలుగా నిందించబడుతుంది.
దాంతో ఊరి పూజారి వీరి జాతకం పరీక్షించి పిల్లలు కలగడానికి శాంతి జరిపించాలనీ, కానీ పిల్లలు పుడితే తల్లిదండ్రులు చనిపోతారని చెబుతాడు. వంశంకోసం ప్రాణత్యాగమైనా చేయడానికి సిద్ధపడతారు వారు. ఆ తర్వాత వారికి బాబు(రాజశేఖర్), లక్ష్మీ(మీరా జాస్మిన్) జన్మిస్తారు. అనుకోకుండా జరిగిన ఓ యాక్సిడెంట్లో తల్లిదండ్రులను కోల్పోయిన పిల్లలను బాబాయ్ లాంటి ఆ ఇంటి పెద్ద దిక్కు చంద్రమోహన్ పెంచుతాడు.
ఇక అక్కడ నుంచి అన్నాచెల్లెళ్ల అనుబంధం కనిపిస్తుంది. చెల్లెల్ని ఎంతగా ప్రేమిస్తాడంటే... తన చెల్లెలు చెప్పిందని ఆపదలో ఆదుకున్న స్నేహితురాలు నందిని( ఆర్తీ అగర్వాల్)కి ఉద్యోగం ఇచ్చి జీవిత భాగస్వామి చేసుకుంటాడు. ఆ తర్వాత పక్క ఊరి కుర్రాడు ఆకాష్(ఆకాష్) తన చెల్లెలకు నచ్చాడని ఆ ఇంటి పనిమనిషిగా వెళ్లి వారి పరిస్థితి తెలుసుకుని చెల్లెల్ని ఆ ఇంటి కోడల్ని చేస్తాడు.
ఇంతవరకూ కథ సాఫీగానే నడుస్తుంది. అకాస్మాత్తుగా సూర్యకాంతం(తమిళనటి) నందిని దూరుపు చుట్టంగా పరిచయం చేసుకుని ఇంట్లో తిష్ట వేస్తుంది. ఆ తర్వాత కథ ఎలాంటి మలుపులు తిరుగుతుంది? అన్నా చెల్లెళ్ల కుటుంబాలతో ఆమె ఎలా ఆడుకుంది... ఇత్యాది విషయాలను వెండితెరపై చూడాల్సిందే....
చిత్రానికి వస్తే... ప్రథమార్థం సాఫీగా సాగినా క్లైమాక్స్లో తన చెల్లెలికి అన్యాయం జరిగిందని తెలుసుకున్న అన్న చేసిన తాత్సారం కథా లోపంగా కనిపిస్తుంది. అన్నకోసం చెల్లిల్ని నందిని, సూర్యకాంతం మాటలతో హింసించడం, పిల్లలు ఆకలేసి అన్న తింటుంటే నోటి దగ్గర అన్నాన్ని లాగేయటం వంటివి ఎన్ని చూపించినా ఫీల్ కలిగించలేదు.
చెల్లెలి పాత్రను చంపేయడం, అది చూసి అన్న గుండె ఆగిపోవడం కృతంగా అనిపిస్తాయి. టీవీ సీరియల్స్లో ఇంతకంటే ఎక్కువగా సెంటిమెంట్లు, లేడీ విలన్లు చూస్తున్న మహిళా ప్రేక్షకులకు 'గోరింటాకు' ఏమాత్రం ఆకట్టుకుంటుందో వేచి చూడాల్సిందే.
|
సలహాలు/ప్రతిస్పందనలు
మీ స్నేహితునికి పంపించు
ఈ పేజీని ముద్రించు
