ప్రధాన పేజి » వినోదం » పర్యాటక రంగం » పర్వత ప్రాంతాలు » వెనీస్ ఆఫ్ ద ఈస్ట్.. కాశ్మీర్ ఆఫ్ రాజస్థాన్.. "ఉదయ్పూర్" (Mountains | Venice of the East | Kashmir of Rajasthan | Lake City | Udaipur | Aravali Mountains | Lake)
Feedback
Print
వెనీస్ ఆఫ్ ద ఈస్ట్.. కాశ్మీర్ ఆఫ్ రాజస్థాన్.. "ఉదయ్పూర్" 
FILE
ఉదయ్పూర్లోని అందమైన సరస్సులు ఆ పట్టణానికి ఎంతో ఖ్యాతిని చేకూర్చాయని చెప్పవచ్చు. ముఖ్యంగా వర్షాధార సరస్సుల మధ్యలో ఈ పట్టణాన్ని నిర్మించటం విశేషం. ఆరావళీ పర్వతాలు, చుట్టూ సరస్సులు, ఉద్యానవనాలు, రాజస్థానీ చేతివృత్తుల నైపుణ్యాన్ని ప్రతిబింబించే నిర్మాణశైలితో ఆకట్టుకునే కోటలు, ఆలయాలు, హోటళ్లుగా మారిపోయిన ఒకనాటి విలాసవంతమైన రాజభవనాలు..... ఇవన్నీ పర్యాటకులను కట్టిపడేసేవే.
ముఖ్యంగా ఉదయ్పూర్ ఇప్పుడు కొత్తజంటల హనీమూన్ కేంద్రంగా మారిపోయిందంటే అతిశయోక్తి కాదు. అందుకే రాజస్థాన్లో జైపూర్ తరువాత పర్యాటకులు ఈ నగరానికే ఎక్కువగా వస్తుంటారు. ఈ నగరాన్ని "కాశ్మీర్ ఆఫ్ రాజస్థాన్"గా మార్చిన ఘనత కూడా అక్కడి సరస్సులదే. అలాంటి వాటిలో మొదటగా చెప్పుకోవాల్సింది "ఫతే సాగర్ సరస్సు".
1678లో ఏర్పాటు చేసిన ఫతే సాగర్ సరస్సు.. పిచోలా సరస్సుకు ఉత్తరాన, సరిగ్గా ఎదురుగా ఉంటుంది. ఇది కృత్రిమ సరస్సు. ఇందులో మూడు దీవులు కూడా ఉన్నాయి. పర్యాటకుల్ని విశేషంగా ఆకర్షించేవి కూడా ఇవే. వీటిలో పెద్దది నెహ్రూ పార్క్. ఈ ఉద్యానవనంలో జూ, రెస్టారెంట్లు ఉన్నాయి. రెండో దీవిలో భారీ వాటర్జెట్ ఫౌంటెయిన్, మూడో దీవిలో సోలార్ ఆబ్జర్వేటరీలు కనువిందు కలిగిస్తాయి. ఈ సోలార్ ఆబ్జర్వేటరీ ఆసియా ఖండంలోనే అత్యున్నతమైనదిగా పేరుగాంచింది.
తరువాత చెప్పుకోవాల్సింది "జైసమంద్ సరస్సు". ఇది ఆసియాలోనే రెండో అతిపెద్ద కృత్రిమ సరస్సు. ఇది ఉదయ్పూర్ పట్టణానికి 48 కిలోమీటర్ల దూరంలో ఉంది. మూడోది.. "రాజ్ సమంద్ సరస్సు". ఇది ఉదయ్పూర్కు 66 కిలోమీటర్ల దూరంలో ఉంది. నాలుగోది "ఉదయ్ సాగర్ సరస్సు" ఇది ఉదయ్పూర్ పట్టణానికి తూర్పున 13 కిలోమీటర్ల దూరంలో ఉంది.
FILE
సరస్సుల తరువాత చెప్పుకోవాల్సింది "సిటీ ప్యాలెస్". ఉదయ్పూర్ నగరానికి దక్షిణాన, సుమారు 350 సంవత్సరాల క్రితం పిచోలా సరస్సులో ఈ ప్యాలెస్ను నిర్మించారు. ఇది 11 కోటల సముదాయం. లేత పసుపు పచ్చ పాలరాతితో నిర్మితమైన ఈ ప్యాలెస్పై సూర్యోదయ, సూర్యాస్తమయ సమయాల్లో సూర్యకిరణాలు పడుతున్నప్పుడు చూస్తే.. ఆ అందం వర్ణనాతీతంగా ఉంటుంది. అలాగే ఈ ప్యాలెస్ బాల్కనీల్లోంచి ఉదయ్పూర్ సౌందర్యాన్ని వీక్షించటం కూడా ఓ మరపురాని అనుభూతిగా మిగిలిపోతుంది.
సిటీ ప్యాలెస్లోని కోటల్లో కిటికీలు, తలుపులు, పై కప్పులు, స్తంభాలలో జీవకళ ఉట్టిపడుతూ అద్భుతంగా అనిపిస్తాయి. ఈ ప్యాలెస్లోనే ఓ మ్యూజియం కూడా ఉంది. కొన్ని వందల సంవత్సరాలనాటి శిల్పాలు, పెయింటింగులు, వస్తువులు, ఫర్నీచర్లను ఇందులో చూడవచ్చు.
ఈ ప్యాలెస్ మరో ప్రత్యేక ఆకర్షణ "జగదీశ్వరాలయం". లక్ష్మీనారాయణుడు కొలువైన ఈ మూడంతస్తుల ఆలయం ఉదయ్పూర్లోనే అతి పెద్దది. అద్భుతంగా చెక్కిన స్తంభాలు, దేవతా చిత్రాలతో నిండిన పై కప్పులు, గోడలు.. పర్యాటకులకు మదినిండా భక్తిభావాన్ని నింపుతాయి.
సంబంధిత సమాచారం కోసం శోధించండి.
దీన్ని కూడా శోధించు: పర్వత ప్రాంతాలు, వెనీస్ ఆఫ్ ద ఈస్ట్, కాశ్మీర్ ఆఫ్ రాజస్థాన్, లేక్ సిటీ, ఉదయ్పూర్, ఆరావళీ పర్వతాలు, సరస్సు, కోటలు
