ఖతార్ నుంచి స్వదేశానికి 10 మంది భారత కార్మికులు

పని పరిస్థితులు సరిగ్గా లేని కారణంగా ఖతార్‌లోని 10 మంది భారత కార్మికులు స్వదేశానికి తిరిగి వచ్చేందుకు రంగం సిద్ధమైంది. వీరికి అక్కడి భారత దౌత్యకార్యాలయం సాయం అందిస్తోందని గల్ఫ్ టైమ్స్ పత్రిక వెల్లడించింది. ఓ మానవవనరుల సంస్థలో పనివాతావరణం సరిగ్గా లేదని పది మంది కార్మికులు భారత దౌత్యకార్యాలయానికి ఫిర్యాదు చేశారు. ఈ కంపెనీలో మొత్తం 100 కార్మికుల దాకా పనిచేస్తున్నారని ఆ పత్రిక తెలిపింది. ఇందులో చాలా వరకు కేరళకు చెందిన వారేనని ఆ పత్రిక పేర్కొంది. ఈ ఫిర్యాదు ఆధారంగా దౌత్యకార్యాలయం ఆ సంస్థకు చెందిన మెనేజర్‌తో చర్చలు జరుపగా, వారికి తమ వేతనాలు, భారత్ వెళ్లేందుకు ఛార్జీలను చెల్లిస్తామని తెలిపారని పత్రిక వెల్లడించింది.