అపరిష్కృత డిమాండ్ల పరిష్కారం కోరుతూ ఇండియన్ ఎయిర్లైన్స్ సంస్థ ఉద్యోగులు బుధవారం మెరుపు సమ్మెకు దిగారు. దేశ వ్యాప్తంగా ఒక్కసారి 12 వేల మంది ఉద్యోగులు ఈ సమ్మెలో పాల్గొనడంతో విమానరాకపోకలకు తీవ్ర అంతరాయం కలిగింది.
దేశంలోని ప్రధాన నగరాలైన ఢిల్లీ, కోల్కతా, చెన్నై, హైదరాబాద్, ముంబై ప్రాంతాల్లో విమాన సేవలు పూర్తిగా స్తంభించాయి. పలు సర్వీసులను రద్దు చేశారు. దీంతో ప్రయాణికులు నానా అవస్థలు పడుతున్నారు. దీనిపై కేంద్ర పౌర విమానయాన శాఖ మంత్రి ప్రఫుల్ పటేల్ మాట్లాడుతూ..పరిస్థితిని నిశితంగా పరిశీలిస్తున్నామని, సమ్మెను ఉపసంహరించుకోని పక్షంలో కఠిన చర్యలు తీసుకుంటామని హెచ్చరించారు.
అలాగే.. ఇప్పటికే 23 మందికి సస్పెన్షన్ ఉత్తర్వులు జారీ చేసినట్టు మంత్రి పటేల్ వెల్లడించారు. దాదాపు 40 శాతం సర్వీసులకు తీవ్ర అంతరాయం కలిగిందని, ప్రయాణికులు తీవ్ర ఇక్కట్లు గురవుతున్నారని పేర్కొన్నారు. ఈ సమ్మె ఇలాగే కొనసాగిన పక్షంలో లాకౌట్ చేయాలని కేంద్రం యోచిస్తున్నట్టు ఉన్నత స్థాయి వర్గాలు పేర్కొన్నాయి.
|
వార్తలు 
