పాలారుపై ఆనకట్ట తథ్యం: వైఎస్సార్ శుక్రవారం, 7 డిసెంబర్ 2007( 09:54 IST )

సుప్రీం కోర్టు తీర్పు వెలువడిన అనంతరం పాలారుపై ఆనకట్ట నిర్మిస్తామని ముఖ్యమంత్రి వైఎస్.రాజశేఖర రెడ్డి ప్రకటించారు. గురువారం చిత్తూరు జిల్లా కుప్పంలో ఆరోగ్యశ్రీ పథకాన్ని ప్రారంభించారు. ఈ సందర్భంగా జరిగిన బహిరంగ సభలో ఆయన ప్రసంగింస్తూ.. పాలారు నదిపై ఆనకట్ట నిర్మించే ప్రాథమిక హక్కు మనకు ఉందన్నారు. ఆ ప్రాథమిక హక్కుతోనే ప్రాజెక్టు నిర్మాణం చేపడుతామన్నారు. అయితే.. దీనిపై సుప్రీం కోర్టులో దాఖలైన కేసు పెండింగ్‌‌లో ఉన్నందువల్ల ఆ అనుమతి వచ్చిన వెంటనే పనులు ప్రారంభింస్తామన్నారు. ఇకపోతే తొమ్మిదేళ్ల పాటు అధికారంలో ఉన్న తెలుగుదేశం పార్టీ రైతులకు తీవ్ర అన్యాయం చేసిందన్నారు. అలాంటి పార్టీకి రైతుల సంక్షేమం గురించి మాట్లాడే నైతిక హక్కు కూడా లేదన్నారు. ముఖ్యంగా.. తెదేపా అధినేత చంద్రబాబుకు పంచెకట్టుపై కనీస అవగాహన కూడా లేదన్నారు. అలాంటిది రైతుల సంక్షేమం కోసం పాటుపడుతున్నామని ప్రచారం చేసుకుంటే సరిపోతుదా అని ప్రశ్నించారు. కాంగ్రెస్ ప్రభుత్వం ఎన్నికల్లో ఇచ్చిన వాగ్ధానాలను చిత్తశుద్ధితో అమలు చేస్తోందని తెలిపారు.