చైనాలోని ఒక బొగ్గు గనిలో శనివారం జరిగిన భారీ పేలుడు ప్రమాదంలో మరణించిన వారి సంఖ్య 87కు పెరిగింది. చైనాలోని కిలాంగ్షియాంగ్ ప్రొవియన్స్లో ఉన్న హేకాంగ్ నగరంలో బొగ్గు గనిలో శనివారం తెల్లవారు జామున 2.30 గంటలకు గ్యాస్ కారణంగా భారీ పేలుడు చోటు చేసుకుంది.
వెంటనే రక్షణ సిబ్బంది ఆ ప్రాంతానికి చేరుకుని గనిలో పని చేస్తున్న 399 మంది కార్మికులను ప్రాణాలతో రక్షించారు. అనేక మంది గనిలో చిక్కుకుని పోయారు. వీరిలో 87 మంది మరణించినట్టు చైనా ప్రభుత్వ అధికారులు వెల్లడించారు.
గనిలో చిక్కుకున్న వారిలో కొన ఊపిరితో కొట్టుమిట్టాడుతున్న 42 మందిని ప్రాణాలతో రక్షించారు. మరో 60 మంది గని శిథిలాల కింద చిక్కుకుని శనివారమే ప్రాణాలు కోల్పోయారు. ఈ సంఖ్య ఆదివారానికి 87కు చేరుకుంది. మరో 21 మంది శిథిలాల కింద చిక్కుకుని ఉన్నట్టు అధికారులు వెల్లడించారు.