|
ఉత్తరాంధ్రలో జరుపుకునే జాతరలలో పైడితల్లి జాతరకు అత్యంత ప్రాముఖ్యత ఉంది. పూసలపాటి రాజుల సోదరిగా చెప్పుకునే పైడితల్లి విజయనగర రాజవంశీయురాలని చెపుతారు. అప్పటి విజయనగర రాజు విజయరామరాజుకు పైడితల్లి సోదరి అని చెపుతారు. ఉదయాన్నే ఆమెను చూడకుండా విజయరామరాజు ఏ పని మొదలుపెట్టేవారు కాదట.
బొబ్బిలి యుద్ధ సమయంలో తాండ్ర పాపారాయునితో తలపడేందుకు వెళుతున్న అన్నను పైడి తల్లి వద్దని వారించిందట. అయినా సమర భూమికేగి పాపారాయుని చేతిలో హతుడయ్యాడు విజయరామరాజు. ఆ దుఃఖంతో పైడితల్లి పెద్ద చెరువులో దూకి ఆత్మహత్య చేసుకుంది. ఆ తర్వాత ఎవరికో కలలో కనబడి తాను కనకదుర్గ అమ్మవారిలో ఐక్యమయ్యాననీ, తన విగ్రహం పెద్ద చెరువులో ఉందని చెప్పిందట.
ఆమె చెప్పినట్లుగానే చెరువులో విగ్రహం కనబడింది. ఈ సంఘటన 1757 సంవత్సరంలో జరిగింది. ఇక అప్పటినుంచి ఆ విగ్రహానికి పూజలు చేస్తూ వస్తున్నారు. విజయదశమి ముగిసిన తొలి మంగళవారం రోజున పైడితల్లి ఉత్సవాలను నిర్వహిస్తారు. ఈ ఉత్సవాల్లో పెద్ద ఎత్తున భక్తులు పాల్గొనే సిరిమాను ఉత్సవానికి అత్యంత ప్రాముఖ్యత ఉంది.
ఎందుకంటే ఆ మాను ఎక్కడ ఉందో పైడితల్లి అమ్మవారే స్వయంగా పూజారి కలలో కనబడి చెపుతుందట. ఆమె ఆజ్ఞానుసారంగా ఆ మానును వెతికి తెస్తారు. ఈ మానును అమ్మవారి ప్రతిరూపంగా భక్తులు భావిస్తారు. ఉత్సవాలలో భాగంగా విజయనగర రాజవంశీయులు కోటపై కూర్చుని అమ్మవారిని ఆహ్వానిస్తారు. రథోత్సవం నాడు పూసపాటి గజపతి వంశీయులు రథాన్ని లాగటంతో ఈ ఉత్సవం చివరి దశకు చేరుకుంటుంది.
|
సలహాలు/ప్రతిస్పందనలు
మీ స్నేహితునికి పంపించు
ఈ పేజీని ముద్రించు
