పేలవమైన ఫామ్, పదేపదే తిరగబెడుతున్న మోకాలి గాయం కారణంగా ఇంగ్లాండ్ మాజీ కెప్టెన్ మైకెల్ వాన్ రిటైర్మెంట్ ప్రకటించాడు. వాన్ మంగళవారం తన రిటైర్మెంట్ నిర్ణయాన్ని బహిర్గతం చేశాడు. ఇంగ్లాండ్లో అత్యంత విజయవంతమైన టెస్ట్ కెప్టెన్గా గుర్తింపు పొందిన మైకెల్ వాన్ ఈ నెల 8న ప్రారంభం కాబోతున్న ఇంగ్లాండ్- ఆస్ట్రేలియా యాషెస్ సిరీస్కు ఎంపిక కాలేదు.
ఈసారి యాషెస్లో ఆడాలని వాన్ భావించినప్పటికీ, అతనికి నిరాశే ఎదురైంది. ఫామ్లో లేకపోవడం, గాయాల కారణంగా గత ఏడాది ఆగస్టు నుంచి జట్టుకు దూరంగా ఉంటున్న మైకెన్ వాన్ మంగళవారం రిటైర్మెంట్ ప్రకటనను విడుదల చేశాడు.. తన రిటైర్మెంట్ నిర్ణయం తక్షణమే అమల్లోకి వస్తుందన్నాడు. అన్ని రకాల క్రికెట్ నుంచి వైదొలుగుతున్నట్లు ప్రకటించాడు.
34 ఏళ్ల ఈ యార్క్షైర్ బ్యాట్స్మన్ 2003- 2008 మధ్యకాలంలో ఇంగ్లాండ్ సారథిగా వ్యవహరించాడు. వాన్ సారథ్యంలోనే ఇంగ్లాండ్ జట్టు 2005 యాషెస్ సిరీస్ గెలుచుకుంది. ఇంగ్లాండ్కు 18 ఏళ్ల తరువాత ఇదే తొలి యాషెస్ సిరీస్ కావడం గమనార్హం.
మొత్తం 51 టెస్ట్ మ్యాచ్ల్లో ఇంగ్లాండ్ సారథిగా ఉన్న మైకెన్ వాన్ ఆ జట్టుకు 26 విజయాలు (11 పరాజయాలు, 14 డ్రాలు) అందించాడు. ఆండ్ర్యూ స్ట్రాస్ నేతృత్వంలోని ప్రస్తుత ఇంగ్లాండ్ జట్టు త్వరలో జరిగే యాషెస్ సిరీస్ను కైవసం చేసుకుంటుందని నమ్మకం వ్యక్తం చేశాడు. స్ట్రాస్ సేనకు ఆ సత్తా ఉందన్నాడు. 2005నాటి యాషెస్ సిరీస్ విజయాన్ని స్ట్రాస్ బృందం పునరావృతం చేయాలని ఆకాంక్షించాడు. | 
సలహాలు/ప్రతిస్పందనలు
మీ స్నేహితునికి పంపించు
ఈ పేజీని ముద్రించు