Missing Girl Case in Tuni: చిన్నారితో పాటు అదృశ్యమైన ఆ కుక్క.. ఆ కీలక పురోగతి
కాకినాడ జిల్లా తుని మండలం దొండవాక పంచాయతీలోని సి.హెచ్. అగ్రహారం నుండి అదృశ్యమైన జ్ఞానేశ్వరి అనే రెండేళ్ల చిన్నారి కేసులో కీలక పురోగతి లభించింది. కుటుంబానికి చెందిన పెంపుడు కుక్క ఈ కేసులో ముఖ్యమైన ఆధారంగా మారింది. గత శనివారం చిన్నారితో పాటు అదృశ్యమైన ఆ కుక్క, మంగళవారం మధ్యాహ్నం ఒక తోట ప్రాంతం వద్ద కాసేపు కనిపించింది.
అయితే, అక్కడ పోలీసులు, చిన్నారి కుటుంబ సభ్యులు ఉండటాన్ని గమనించిన ఆ కుక్క అక్కడి నుంచి పారిపోయింది. అదృశ్యమైన చిన్నారి ఆచూకీ కనుగొనడంలో ఆ కుక్క కీలక ఆధారాలను అందించగలదని పోలీసులు భావిస్తున్నారు. మొదట్లో దానిని పట్టుకునే ప్రయత్నాలు విఫలమైనప్పటికీ, ఉత్తరప్రదేశ్కు చెందిన యువకుల బృందం ఆ జంతువును పట్టుకోగలిగింది.
ప్రస్తుతం ఆ కుక్క అసాధారణంగా ప్రవర్తిస్తోందని, దాని పరిస్థితిని సాధారణ స్థితికి తెచ్చేందుకు ప్రయత్నాలు జరుగుతున్నాయని అధికారులు తెలిపారు. ఆ కుక్క కదలికల ద్వారా చిన్నారి ఆచూకీ తెలుసుకోవచ్చనే ఆశతో, దానికి జీపీఎస్ ట్రాకర్ను అమర్చి తిరిగి వదిలిపెట్టాలని పోలీసులు యోచిస్తున్నారు.
