ఆంధ్రప్రదేశ్ ముద్ధుగుమ్మ : కొండపల్లి బొమ్మ

Munibabu| Last Modified మంగళవారం, 2 సెప్టెంబరు 2008 (17:14 IST)
కొండపల్లి అనే పేరు చెప్పగానే ముచ్చటైన ముద్ధులొలికే చెక్కబొమ్మలు గుర్తుకు వస్తాయి. కళాకారులు చెక్కతో వివిధ రూపాల్లో అత్యంత అద్భుతంగా, అందంగా తయారు చేసిన ఈ బొమ్మలు దేశ విదేశాల్లో ఎందరినో ఆకట్టుకుంటోన్న సంగతి తెలిసిందే. ఆంధ్రప్రదేశ్ పేరును ఖండాతరాలు దాటించిన విశేషాల్లో కొండపల్లి బొమ్మలకూ స్థానం ఉందని చెప్పడంలో అతిశయోక్తి లేదు.

ఆంధ్రప్రదేశ్‌లోని కృష్ణా జిల్లాలో గల ఇబ్రహీంపట్నం మండలంలో వెలసిన ఓ చిన్న గ్రామమే కొండపల్లి. ఇక్కడుండే కళాకారులు పొనికి చెక్కతో తయారు చేసే వివిధ కళారూపాలు కొండపల్లి బొమ్మల పేరుతో దేశాంతర ఖ్యాతిని ఆర్జిస్తున్నాయి. ఎలాంటి అచ్చుల్లోనూ పోసి ఈ కొండపల్లి బొమ్మలను తయారు చేయకపోవడం ఈ బొమ్మల ప్రత్యేకత.

కేవలం చేతితో కొన్ని రకాల పనిముట్లను ఉపయోగించి మాత్రమే కొండపల్లి బొమ్మలను తయారు చేస్తారు. ఒక బొమ్మ లాంటిదే మరొకటి చేయాలంటే మళ్లీ చేతితో కొత్తగా తయారు చేయడమే తప్ప ఎలాంటి నమూనాలు, అచ్చులు ఉపయోగించకపోవడం వీటి ప్రత్యేకత. తేలికైన పొనికి అనే చెక్కతో తయారు చేయబడే ఈ కొండపల్లి బొమ్మల తయారీ వెనక కళాకారుల శ్రమ ఎంతో దాగిఉంది.

ముందుగా పొనికి చెక్కపై తయారు చేయాల్సిన బొమ్మ ఆకారాన్ని చెక్కుతారు. అనంతరం రంపపు పొట్టు, చింత గింజల పొడితో ఈ చెక్కబొమ్మకు రూపాన్ని సంతరిస్తారు. దీనికి సున్నం పూసి ఆరబెట్టి అటుపై వివిధ రంగులతో బొమ్మను ఆకర్షనీయంగా చేస్తారు. కొండపల్లి బొమ్మల్లో ఏనుగు అంబారి, మావటివాడు, నృత్యం చేసే అమ్మాయి బొమ్మలు, పల్లె పడుచులు లాంటి బొమ్మలు చూచేవారిని విపరీతంగా ఆకర్షిస్తాయి.




దీనిపై మరింత చదవండి :