కరివేపాకును తినకుండా పక్కనపెట్టేస్తే.. పోషకాల్ని పడేసినట్టే!
స్త్రీలలో జుట్టురాలే సమస్య అధికంగా ఉంటుంది. ఎన్ని క్రీములు, షాంపులు వాడిన ఫలితం కనిపించడం లేదని బాధపడుతుంటారు. ఇలాంటి వారికి సహజ సిద్ధమైన కరివేపాకు ఎంతో ఉపయోగపడుతుంది. కరివేపాకు వంటకాలకు రుచి, సువాసన ఇవ్వడమే కాకుండా మన జుట్టు సంరక్షణకు కావలసిన పోషకపదార్ధాలను అందిస్తుంది. కరివేపాకుని తినకుండా పక్కన పడేస్తే మీరెన్నో పోషకాలను పడేస్తున్నారని అర్ధం చేసుకోండి. కూరకు రుచిని సమకూర్చడమే కాకుండా ఇంకా ఎన్నో విధాలుగా మీకు ఉపయోగపడుతుంది.
కరివేపాకు వలన చాలా ఆరోగ్య ప్రయోజనాలు ఉన్నాయి. జుట్టు వత్తుగా పెరగడానికి సహాయపడుతుంది. కరివేపాకు జుట్టు రంగు నలుపుగా, మెరిసేట్టుగా చేస్తుంది. ఒక గిన్నెలో అరకప్పు కొబ్బరి నూనె వేసి, అందులోనే కరివేపాకు వేసి సన్నని మంట మీద వేడిచెయ్యాలి. వేడిచేసిన ఈ నూనెను రోజూ జుట్టుకు పట్టిస్తే జుట్టు రాలే సమస్య ఉండదు. అలాగే జుట్టు తెల్లబడకుండా ఉంటుంది.
కొన్ని కరివేపాకులను తీసుకోని పేస్ట్ చేసుకుని, ఈ మిశ్రమాన్ని పెరుగులో కలిపి జుట్టుకు బాగా పట్టించాలి. ఇలా అరగంట ఉంచిన తరువాత హెర్బల్ షాంపూ‌తో తలస్నానం చేయాలి. ఇలా వారానికి ఒక సారి చేస్తే జుట్టు రాలే సమస్య పూర్తిగా తగ్గుతుంది. ముందుగా కరివేపాకును కొంచెం నీరు పోసి రుబ్బుకోవాలి. రుబ్బుకున్నఈ మిశ్రమంలో గుడ్డు తెల్లసొన, కొద్దిగా పెరుగు వేసి పేస్ట్‌లా చేసుకోవాలి. తలకు ప్యాక్‌గా వేసుకోవాలి. ఇలా క్రమంగా చేస్తే మంచి ఫలితం కనిపిస్తుంది.
