కాక్రోచ్ జనతా పార్టీకి విశేష స్పందన... ఇన్‌స్టాలో 66 లక్షల పైగా ఫాలోవర్లు

Written By: ఠాగూర్

Updated: Thu, 21 May 2026 (12:09 IST)

సోషల్ మీడియా ఎపుడూ ఏది ట్రెండ్ అవుతుందో చెప్పడం కష్టసాధ్యంగా మారింది. తాజాగా కాక్రోచ్ జనతా పార్టీ అనే సెటైరికల్ వెబ్‌సైట్ ఇంటర్నెట్‌లో సంచలనంగా మారింది. కొద్ది రోజుల క్రితం ప్రారంభమైన ఈ వెబ్‌సైట్‌కు సంబధించిన ఇన్‌స్టా పేజీ కొన్ని రోజుల్లోనే ఏకంగా 66 లక్షల మందికిపై ఫోలోయర్లు వచ్చేశారు. 

అభిజిత్ డిప్కే అనే వ్యక్తి ఈ వెబ్‌సైట్‌ను రూపొందించారు. ఆయన తనను తాను కాక్రోచ్ జనతా పార్టీ వ్యవస్థాపక అధ్యక్షుడుగా అభివర్ణించుకున్నారు. యువత చేత, యువత కొరకు, యువత యొక్క రాజకీయ వేదిక అనేది ఈ పార్టీ నినాదంగా ఇన్‌స్టా, ఎక్స్ ‌ఖాతాల్లో పేర్కొన్నారు. ఇదంతా కేవలం వ్యంగ్యం మాత్రమేనని, వెబ్‌సైట్‌లో స్పష్టంగా పేర్కొన్నారు. పార్టీలో చేరాలనుకునే వారి కోసం ఒక ఫారమ్ కూడా అందుబాటులో ఉంచడం గమనార్హం. 

ప్రస్తుతం ఈ పేజీలో సుమారు 50 వరకు ఫోటోలు, వీడియోలు రీల్స్ ఉన్నాయి. దేశంలోని ప్రధాన రాజకీయ పార్టీలతో పోలిస్తే ఈ సెటైరికల్ పేజీ ఫాలోయర్ల సంఖ్య ఆశ్చర్యం కలిగిస్తుంది. ఇన్‌స్టాలో ఆమ్ ఆద్మీ పార్టీకి 1.9 మిలియన్లు, బీజేపీకి 8.7 మిలియన్లు, కాంగ్రెస్ పార్టీకి 13.3 మిలియన్ల ఫాలోయర్లు ఉన్నారు. ఈ నేపథ్యంలో ఓ సెటైరికల్ పేజీకి ఇంత తక్కువ సమయంలో ఈ స్థాయిలో ఆదరణ లభించడం సోషల్ మీడియాలో చర్చనీయాంశంగా మారింది.