ఆగని దాడులు : మరో విద్యార్థిపై పంజా

Ganesh|
FILE
ఆస్ట్రేలియాలో భారత విద్యార్థులపై జరుగుతున్న జాత్యహంకార దాడుల పరంపరకు అడ్డుకట్ట పడే మార్గమే కనిపించటం లేదు. తాజాగా ఇండోర్‌కు చెందిన మోహిత్ మంగళ్ అనే భారతీయ విద్యార్థిపై నలుగురు ఆస్ట్రేలియా యువకులు ఆదివారం రాత్రి దాడికి పాల్పడ్డారు.

సిడ్నీలోని ఓ షాపింగ్ మాల్ నుంచి ఇంటికి తిరిగి వెళ్తున్న మోహిత్ మంగళ్‌పై దుండగులు బీరు సీసాలతో దాడికి తెగబడ్డారు. కాగా.... ఆ షాపింగ్ మాల్‌లో సూపర్ వైజర్‌గా విధులు నిర్వహిస్తున్న మోహిత్‌ తలపై దుండగులు బీరు సీసాలతో పగులగొట్టారు. అంతేగాకుండా, బేస్‌బాల్ బ్యాటుతో అతడిని తీవ్రంగా గాయపరిచారు.

ఈ విషయమై మోహిత్ తండ్రి అనిల్ మంగళ్ మీడియాతో మాట్లాడుతూ... జాత్యహంకారుల దాడి నుంచి తమ కుమారుడు ప్రాణాలతో బయటపడ్డాడని వెల్లడించారు. అయితే తన కుమారుడికి శత్రువులెవరూ లేరనీ, ఇది ఖచ్చితంగా జాత్యహంకారుల మూర్ఖత్వంవల్లనే ఈ దాడి జరిగి ఉంటుందని ఆయన ఆవేదన వ్యక్తం చేశారు.

ఇదిలా ఉంటే... ఆసీస్ దాడులకు అడ్డుకట్ట వేసేందుకు ఆ దేశంలో పర్యటిస్తున్న భారత విదేశాంగ శాఖా మంత్రి ఎస్.ఎం. కృష్ణ... అక్కడి రక్షణ చర్యలపై సంతృప్తి వ్యక్తం చేసిన రెండు రోజుల్లోపే మరో జాత్యహంకార దాడి జరగటం దురదృష్టకరమైన పరిణామం. ఓ వైపు ఆస్ట్రేలియా ప్రభుత్వం దాడులను అరికట్టేందుకు చర్యలు తీసుకుంటామని చెబుతున్నా, మరోవైపు విద్యార్థులపై దాడులు రోజురోజుకు పెరుగుతుండటం గమనార్హం.


దీనిపై మరింత చదవండి :