గృహ హింస బాధితుల సేవలో "భారత్ గ్రూప్"

FILE
గృహ హింస బాధితులైన దక్షిణాసియా మహిళలకు చేయూతనిచ్చేందుకు "భారత్ యూత్ గ్రూప్" అనే సంస్థ ముందుకు వచ్చింది. బాధిత మహిళలకు ఆశ్రయం కల్పించేందుకు అవసరమైన నిధుల సేకరణకుగానూ... ఈ సంస్థ మే 30న "ఫ్యూజన్ 2009" పేరుతో పలు సాంస్కృతిక పోటీలను నిర్వహించింది.

నార్త్ వేల్స్‌లోని పెన్ బ్రూక్ మిడిల్ స్కూల్‌లో నిర్వహించిన ఈ ఫండ్ రైజింగ్ సాంస్కృతిక కార్యక్రమాల్లో భాగంగా... శాస్త్రీయ, జానపద, సినిమా నృత్యాలు, శాస్త్రీయ, లలిత సంగీతం, ఇన్‌స్ట్రుమెంటల్ తదితర విభాగాల్లో పోటీలను భారత్ గ్రూప్ నిర్వహించింది. కాగా.. ఈ పోటీలలో పెన్సిల్వేనియా, న్యూయార్క్, న్యూజెర్సీ తదితర రాష్ట్రాల నుంచి 160 మందికి పైగా ఉత్సాహవంతులైన చిన్నారి కళాకారులు పాల్గొనగా, 450 మందికి పైగా ప్రేక్షకులు హాజరయ్యారు.

ఈ ఫండ్ రైజింగ్ కార్యక్రమం ద్వారా 8,550.01 డాలర్ల విరాళం సమకూరినట్లు భారత్ యూత్‌ గ్రూప్ నిర్వాహకులు... పవన్ గేదెల, అనూజ గేదెల ప్రకటించారు. ఈ మొత్తాన్ని పెన్సిల్వేనియాలోని "సర్వీస్ అండ్ ఎడ్యుకేషన్ ఫర్ విమెన్ ఎగెనెస్ట్ అబ్యూజ్" అనే సేవా సంస్థకు అందజేయనున్నట్లు వారు ప్రకటించారు.

Ganesh|
ఇదే సందర్భంగా... భారత్ యూత్ గ్రూప్ అధ్యక్షురాలు కీర్తన శెట్టి తమ సంస్థ సభ్యులను ప్రేక్షకులకు పరిచయం చేస్తూ... తాము సేవా సంస్థను స్థాపించడానికి వెనుక ఉన్న కారణాలను వివరించారు. అలాగే 2009-10 సంవత్సరానికి ఎంపికైన కమిటీ సభ్యులను కూడా ఆమె పరిచయం చేశారు. సాంస్కృతిక కార్యక్రమాలకు హాజరై, విజయవంతం చేసిన ప్రతి ఒక్కరికీ, కీర్తన పేరుపేరునా ధన్యవాదాలు తెలిపారు.


దీనిపై మరింత చదవండి :