మృగశిర కార్తె అంటే ఏంటి విశేషం.. ఇంద్రుడు ఎంత వైభోగంగా ఉంటాడో..?

Written By: సెల్వి

Updated: Mon, 8 Jun 2026 (11:16 IST)

Mrigasira Karthi 2026

మృగశిర కార్తె అనగానే అందరికీ గుర్తొచ్చేది మృగశిర చేపలు. వాతావరణం హఠాత్తుగా వేడి నుండి చల్లదనానికి మారే క్రమంలో శరీరంలో రోగనిరోధక శక్తి తగ్గుతుంది. ఈ సమయంలో గుండె జబ్బులు, ఉబ్బసం (ఆస్తమా) వంటి శ్వాసకోశ వ్యాధులు రాకుండా ఉండేందుకు పూర్వీకుల కాలం నుండి మృగశిర రోజున చేపలు తినడం ఒక ఆరోగ్యకరమైన ఆచారంగా వస్తోంది. హైదరాబాద్‌లో ప్రభుత్వ ఆధ్వర్యంలో బత్తిన సోదరుల ప్రసిద్ధ చేప ప్రసాదం పంపిణీ కూడా ఈ కార్తె ప్రారంభం రోజే జరగడం విశేషం. 

మృగశిర కార్తె రాక రైతులకు నిజమైన పండుగ లాంటిది. వర్షాల ఆశతో అన్నదాతలు తమ పొలాల వైపు అడుగులు వేస్తారు. అందుకే ఈ కాలాన్ని ఏరువాక కాలం అని పిలుస్తారు. నాగలిని, ఎడ్లను పూజించి తొలి దుక్కి దున్నడం ఈ కార్తెలోనే విశేషం. జ్యోతిష్య శాస్త్రం, తెలుగు పంచాంగం ప్రకారం సూర్యుడు రోహిణి నక్షత్రం నుండి మృగశిర నక్షత్రంలోకి ప్రవేశించడంతో ఈ కార్తె ప్రారంభమవుతుంది.

నైరుతి రుతుపవనాల రాకతో చల్లని గాలులు వీస్తూ, తెలుగు రాష్ట్రాల్లో అక్కడక్కడా మోస్తరు నుండి భారీ వర్షాలు కురుస్తాయి. ఎండకు ఎండిపోయిన చెరువులు, కుంటలు, వాగులు మృగశిర వర్షాలతో మళ్లీ జలకళను సంతరించుకుని కొత్త నీటితో నిండుతాయి.

ఆధ్యాత్మిక కోణంలో చూస్తే, వర్షాలు పడకుండా అడ్డుపడిన వృతాసురుడిని అంటే మృగాసురుడిని సంహరించి, భూమిపై తొలకరి జల్లులు కురిపించిన వర్షదేవుడు... ఇంద్రుని విజయానికి సంకేతం ఈ మృగశిర కార్తె. తూర్పు ఆకాశంలో ఇంద్ర నక్షత్రం ఉదయించగానే, సూర్యుడు మృగశిరలోకి ప్రవేశిస్తాడు. ఇది రుతుపవనాల రాకకు, సకాలంలో వర్షాలు కురవడానికి సంకేతం. ఈ కార్తెలో నియమాలను ఎవరైతే పాటిస్తారో వారికి ఇంద్రయోగం లభిస్తుంది. 

అంటే స్వర్గాధిపతి ఇంద్రుడు ఎంత వైభోగంగా ఉంటాడో భూమిపై నివశించే మనుషులు కూడా అంతే వైభోగంతో జీవించేందుకు అవకాశం లభిస్తుంది. ఈ మృగశిర కార్తె ఈరోజు నుంచి జూన్ 21 వరకు వుంటుంది. 14 రోజులు ఉదయాన్నే లేచి సూర్య నమస్కారాలు చేయడం, ఇంట్లో కర్పూర హారతి లేదా సాంబ్రాణి ధూపం వేయడం వల్ల గాలిలోని సూక్ష్మక్రిములు నశిస్తాయి. ఆరోగ్యంగా వుంటారు.