కూర్మావతార దివ్య క్షేత్రం శ్రీకూర్మం

Munibabu| Last Modified మంగళవారం, 22 జులై 2008 (13:58 IST)
మహావిష్ణువు ఎత్తిన దశావతారాల్లో కూర్మావతారానికి ఓ విశిష్టత ఉంది. అమృతం కోసం దేవదానవులు క్షీరసాగరాన్ని మధించినపుడు కవ్వంగా వాడిన పర్వతం క్షీరసాగరంలో మునిగిపోకుండా ఉండడానికి విష్ణువు కూర్మ రూపుడై పర్వతాన్ని తన వీపుపై మోశాడని పురాణాలు చెబుతున్నాయి.

అలా మహా విష్ణువు అవతారాల్లో విశిష్ట స్థానాన్ని ఆక్రమించిన కూర్మావతారానికి దేశంలోనే ఒకే ఆలయం మాత్రమే ఉంది అదే శ్రీకూర్మం క్షేత్రం. ఆంధ్రప్రదేశ్‌లోని శ్రీకాకుళంకు దాదాపు 13 కిలోమీటర్ల దూరంలో ఈ ఆలయం కొలువై ఉంది. ఈ ఆలయం ఉన్నది ఓ చిన్న గ్రామమే అయినా ఆలయానికి మాత్రం చారిత్రాత్మక విశిష్టత ఉంది.

ఆలయ విశేషాలు
శ్రీకూర్మం గ్రామంలో వెలసిన ఈ దివ్యక్షేత్రం దాదాపు నాలుగో శతాబ్ధంలో నిర్మించబడినట్టుగా దేవాలయ గోడలపై ఉన్న శిలా శాసనాలు చెబుతున్నాయి. విశాలమైన ప్రాంగణంలో నిర్మించబడిన ఈ ఆలయం అద్భుతమైన శిల్పసంపదకు ఖజానాగా ఉండడం విషేశం. ఆలయానికి పెద్దగా భక్తులు తాకిడి లేకపోయినా ఆలయం మాత్రం చూచి తీరాల్సినంత అద్భుతంగా ఉంటుంది.

ఈ ఆలయంలో ఉన్న స్థంబాలు, గోడలు, ఆలయ శిఖరాలపై చెక్కబడిన శిల్పాలు నేటికీ చెక్కు చెదరకుండా ఉండి భక్తుల మనసులో చెదిరిపోని స్థానాన్ని సంపాదిస్తాయి. అలాగే ఆలయానికి కొద్ది దూరంలో ఓ పెద్ద కోనేరు ఉంది. దీనిని శ్వేత పుష్కరిణి అని పిలుస్తుంటారు. దీనిలో శ్రీ కృష్ణుడు గోపికా సమేతుడై జలకాలాడడని చెబుతుంటారు.




దీనిపై మరింత చదవండి :