"లైఫ్స్టైల్" లోగో ఆవిష్కరణ
|
ముప్పలనేని శివ దర్శకుడిగా ఓరుగంటి మధుసూధన రెడ్డి సమర్పణలో శ్రీ మాధవ్ పట్నాయక్ నిర్మిస్తున్న "లైఫ్ స్టైల్" చిత్రం లోగో ఆవిష్కరణ ప్రసాద్ ల్యాబ్స్లో జరిగింది. ఈ కార్యక్రమంలో డి. రామానాయుడు, మాధవ్ పట్నాయక్, శ్రీజ, ఘటికాచలం, శిశ్చల్, కార్తీక్, అభిరామ్, మీనాక్షిదీక్షిత్, అనన్య, రంగారెడ్డి తదితరులు పాల్గొన్నారు.
లోగోను ఆవిష్కరించిన అనంతరం డా. డి. రామానాయుడు మాట్లాడుతూ... శివ ఏది చేసినా ఓ ప్రణాళిక ప్రకారం చేస్తాడని, ఈ సినిమా స్టిల్స్ చూస్తుంటే యువతరం సినిమాలాగా కన్పిస్తోందన్నారు. ఈ సినిమా సంగీత దర్శకురాలు శ్రీజ తాను చేసిన సీడీని తనకిచ్చిందని, ఆ సీడీని ముప్పలనేని శివకు ఇచ్చానన్నారు. దీంతో ముప్పలనేని శివ ఆమెను సంగీత దర్శకురాలిగా పరిచయం చేశాడని రామానాయుడు చెప్పారు.
నిర్మాత మాధవ్ పట్నాయక్ మాట్లాడుతూ... ఈ చిత్రాన్ని సంక్రాంతికి విడుదల చేసేందుకు సన్నాహాలు చేస్తున్నామన్నారు.
ముప్పలనేని శివ మాట్లాడుతూ.. ఇది యూత్ఫుల్ ఎంటర్టైనర్తో చక్కటి ప్రేమకథా చిత్రంగా తెరకెక్కనుందన్నారు. ఈ చిత్రాన్ని 60 రోజుల పాటు రామోజీ ఫిలింసిటీ, బాపట్ల ఇంజనీరింగ్ కాలేజీ, బ్యాంకాక్ వంటి ప్రదేశాల్లో చిత్రీకరించామని చెప్పారు. ఇప్పటికే 90శాతం షూటింగ్ పూర్తయిందని, డిసెంబరులో చివరి షెడ్యూల్ పూర్తి చేస్తామని శివ వెల్లడించారు.
సంగీత దర్శకురాలు శ్రీజ మాట్లాడుతూ... ఈ చిత్రంలో ఏడు పాటలున్నాయని, అన్నింటిలోనూ సాహిత్య విలువలున్నాయన్నారు. ఇంకా ఈ చిత్రానికి మాటలు... ఘటికాచలం, పాటలు... భాస్కరపట్ల, జయసూర్య, కెమేరా.. ప్రసాద్, స్క్రీన్ప్లే, దర్శకత్వం... ముప్పలనేని శివ.
