"నేను దేవుడ్ని" అంటోన్న బాల

WD

"శివపుత్రుడు", "శేషు" వంటి హిట్ చిత్రాల దర్శకుడు బాల, తాజాగా కాశీలోని అఘోర సన్యాసుల నేపథ్యంలో... తమిళంలో ఓ చిత్రాన్ని రూపొందించారు. దాన్ని తెలుగులో "నేను దేవుడ్ని" అంటూ ప్రేక్షకుల ముందుకు తెస్తున్నారు. ఆర్య, పూజ నటించిన ఈ చిత్ర ట్రైలర్‌ను హైదరాబాద్‌లో గురువారం ప్రదర్శించారు.

ఈ సందర్భంగా బాలా మాట్లాడుతూ.. ప్రతి మనిషి నేను దేవుడ్ని అనుకుంటారని, ప్రతి మనిషిలోనూ దేవుడుంటాడనేదే ఈ చిత్ర ప్రధాన ఇతివృత్తమన్నారు.

హీరో ఆర్య మాట్లాడుతూ... తాను తమిళంలో చేసిన రెండు సినిమాలు తెలుగులోకి అనువదించారని, ఈ సినిమాను కూడా ప్రేక్షకులు ఆదరిస్తారని ఆశించారు.

నిర్మాత శ్రీనివాసన్ మాట్లాడుతూ.. ఈ సినిమా కోసం మూడు సంవత్సరాలు కష్టపడ్డానని, ఆర్య తన పాత్రకు అనుగుణంగా నటించేందుకు చాలా శ్రమించాడని కొనియాడారు. తెలుగులో ఈ చిత్రం మంచి విజయం సాధిస్తుందని నిర్మాత ఆశాభావం వ్యక్తం చేశారు.

తమ్మారెడ్డి భరద్వాజ మాట్లాడుతూ.. 50 సంవత్సరాల నుంచి ఈ పతాకంపై సినిమాలను నిర్మిస్తున్నారని, బాల చిత్రాలు ఆలోచించేవిగా ఉంటాయని చెప్పారు. ఈ చిత్రం కూడా అలాగే ఉంటుందని, ఫిబ్రవరి ఆరున చిత్రాన్ని విడుదల చేస్తున్నారని చెప్పారు.