Thejam Audio release on April month end | ఏప్రిల్ నెలాఖరున "తేజం" ఆడియో
|
ఈ చిత్ర విశేషాలను నిర్మాత రాజశేఖర్ చెబుతూ.. ఇప్పటి వరకు జరిగిన షూటింగ్తో 90 శాతం షూటింగ్ పార్ట్ పూర్తయిందన్నారు. ఇంకా కొన్ని కీలక సన్నివేశాలు, ఒక్క సాంగ్ మాత్రమే మిగిలి ఉందని ఆయన తెలిపారు.
ప్రస్తుతం డబ్బింగ్ కార్యక్రమాలు జరుపుకుంటున్న ఈ సినిమాలో 9 మంది హీరోలను, ఒక్క హీరోయిన్ను కొత్తగా పరిచయం చేస్తున్నామని వెల్లడించారు. మీడియా పర్సన్గా ఈటీవీలోనూ, ప్రముఖ చిత్ర నిర్మాణ సంస్థ, సురేష్ ప్రొడక్షన్స్లోనూ పనిచేసిన అనుభవం ఈ చిత్ర నిర్మాణంలో తనకెంతో దోహదపడిందని రాజశేఖర్ తెలిపారు.
ఇక దర్శకుడి విషయానికొస్తే గత 12 సంవత్సరాలుగా "విక్టరీ" వెంకటేష్ నటించిన పలు చిత్రాలకు అసోసియేట్గా పనిచేయడమే కాకుండా "లైవ్ అండ్ లైట్లైవ్" అనే డాక్యుమెంటరీని రూపొందించారని నిర్మాత వివరాలందించారు. ఈ డాక్యుమెంటరీకి సినిమాకు బెస్ట్ డైరక్టర్గా 2006 నంది అవార్డు అందుకోవడమే కాకుండా, మెగాస్టార్ చిరంజీవి, యువసామ్రాట్ నాగార్జునల ప్రత్యేక అభినందనలను అందుకున్నారని రాజశేఖర్ తెలియజేశారు.
కథ చెప్పిన దానికన్నా దర్శకుడు అద్భుతంగా సినిమా తెరకెక్కించారని, ఏ మాత్రం కాంప్రమైజ్ కాకుండా యూనిట్ అందరి సహకారంతో ఈ చిత్రాన్ని రూపొందిస్తున్నామని నిర్మాత పేర్కొన్నారు. ప్రస్తుతం ప్రేక్షకులు కొత్తదనం కోసం ఎదురుచూస్తున్నారని, తమ సినిమా అన్ని వర్గాల ప్రేక్షకులను అలరిస్తుందని నిర్మాత ఆశాభావం వ్యక్తం చేశారు. ఈ నెలాఖరున "తేజం" ఆడియోను, మే నెల రెండో వారంలో సినిమాను విడుదల చేసేందుకు సన్నాహాలు చేస్తున్నామని తెలిపారు.
