Cinema | Tollywood | Pyracy | D. Suresh Babu | పైరసీని అరికట్టకపోతే షూటింగ్‌లు బంద్: సురేష్

WD

పైరసీ వ్యవహారం ముదిరి పాకాన పడుతున్నట్లు కనబడుతోంది. బుధవారం చిత్ర పరిశ్రమలోని పెద్ద నిర్మాతలందరూ ఒకచోట చేరి పైరసీని అరికట్టేందుకు ప్రభుత్వం తక్షణమే ఓ చట్టాన్ని ఏర్పాటు చేస్తున్నట్లు హామీ ఇవ్వాలని డిమాండ్ చేశారు. పొరుగు రాష్ట్రాలైన కర్నాటక, కేరళ, తమిళనాడులో ఉన్నట్లు పైరసీని గూండా యాక్ట్ కిందకు తీసుక రావాలని కోరారు.

ఉన్న చట్టాన్ని అమలు చేస్తే సరిపోతుందని ముఖ్యమంత్రి రోశయ్య వ్యాఖ్యానిస్తే, పరిశీలిస్తామని మంత్రి గీతారెడ్డి చెప్పడంపై నిర్మాతల మండలి అసంతృప్తిని వ్యక్తం చేసింది.

గతంలో పైరసీ సెల్ ఏర్పాటు చేసి పైరసీలకు పాల్పడుతున్న సుమారు 6వేల మందిని పట్టుకుని పోలీసులకు అప్పచెబితే... వారంతా దర్జాగా బయటే తిరుగుతున్నారన్నారు. వారికి సరైన శిక్షలు పడకపోవడంతో తిరిగి కాలర్ ఎగరేసుకుంటూ పైరసీ కార్యకలాపాలను యధేచ్ఛగా చేసుకుంటూ పోతున్నారని ఆందోళన వ్యక్తం చేశారు.

కోట్ల రూపాయలు ఖర్చు పెట్టి సినిమా తీస్తుంటే... పైరసీ రాయుళ్లు సినీ నిర్మాతలను భారీగా దెబ్బతీస్తున్నారన్నారు. పైరసీని అరికట్టే వరకూ ఆందోళన చేస్తామని హెచ్చరించారు. అవసరమైతే షూటింగ్‌లను ఆపివేస్తామని నిర్మాత డి. సురేష్ బాబు అన్నారు. తక్షణమే ప్రభుత్వం స్పందించిన పైరసీని అడ్డుకునేందుకు అవసరమైన చర్యలు చేపట్టాలని డిమాండ్ చేశారు.