''కుచేలుడు'' పేరు మార్చుకుంటాడా... ?

File

WD

రజనీకాంత్ ముఖ్యపాత్రలో జగపతిబాబు, మీనా జంటగా ఓ చిత్రం రూపొందుతోంది. తమిళ, తెలుగు భాషల్లో రూపొందుతోన్న ఈ చిత్రానికి ప్రారంభంలో 'కుచేలుడు' అనే టైటిల్ పెట్టనున్నట్టు ప్రచారం జరిగింది. ఓ మళయాళ చిత్రం ఆధారంగా రూపొందుతోన్న ఈ చిత్రానికి కథ రీత్యా కుచేలుడు అనే టైటిల్ సరిపోతుంది కాబట్టి అదే పేరు పెట్టనున్నట్టు ప్రచారం జరిగింది.

అయితే ప్రస్తుతం ఈ చిత్రానికి ఇంకా టైటిల్ ఖరారు కాలేదని నిర్మాత అయిన అశ్వినీదత్ ప్రకటించారు. దాంతో ఈ చిత్రానికి ఎలాంటి టైటిల్ పెడుతారో అని అనుకుంటున్న సమయంలో 'కథానాయకుడు' అనే టైటిల్ పెట్టే ఆలోచనలో దర్శక నిర్మాతలు ఉన్నట్టు టాలీవుడ్ సమాచారం. ఈ టైటిల్ వెనుక ఓ కథ కూడా ఉందని కొందరి వాదన.

చిత్రంలో రజనీకాంత్ పాత్ర అతిథి పాత్ర మాత్రమే. కానీ రజినీ ఇమేజ్ దృష్ట్యా ఆ పాత్రనే హైలెట్ చేయడానికి నిర్మాత, దర్శకులు ప్రయత్నిస్తున్నారు. అందుకు తగ్గట్టే ఇప్పుడు సినిమా టైటిల్ సైతం రజనీ పాత్రకు తగ్గట్టే పెట్టడానికి ప్రయత్నిస్తున్నారు. ఈ చిత్రంలో రజనీకాంత్ సినిమా హీరో పాత్రలో నటిస్తున్నారు.

అందుకే ఈ చిత్రానికి కథానాయకుడు అనే టైటిల్ పెట్టడం ద్వారా రజనీ పాత్రను హైలెట్ చేయాలన్నదే దర్శక, నిర్మాతల ఆలోచన అన్నది టాలీవుడ్ కథనం. అయితే ఈ చిత్రంలో పూర్తి నిడివి పాత్ర చేయనున్నది మాత్రం జగపతిబాబు. కథ ప్రకారం జగపతిబాబు స్నేహితునిగా రజనీకాంత్ నటిస్తున్నారు.

గతంలో చంద్రముఖి చిత్రంలో సైతం రజనీకాంత్ పాత్రను హైలెట్ చేయడం కోసం మాతృకలోని పాత్ర నిడివి పెంచడం జరిగింది. అదే తరహాలో ఇప్పుడు ఈ చిత్రంలో సైతం రజనీపాత్ర కోసమే టైటిల్ కూడా మార్చనున్నారని టాలీవుడ్‌లో చెప్పుకుంటున్నారు.