పొట్టి గౌనుతో ప్రియాంక తంటా

సినిమాల్లో టూ పీస్ డ్రెస్సులేసుకుని హీరో వెంబడి గెంతే హీరోయిన్లను చూసి ప్రేక్షకులు ఏదో ఆ కాసేపు భరిస్తారు కానీ, పార్టీలకు, ఫంక్షన్లకు సైతం ఇదే రకమైన డ్రెస్సులేసుకొస్తే జనం చూపులు పార్టీపై లఘ్నం కావడం కష్టమే కదా. అయినా ఈ టూపీస్ హీరోయిన్లకు ఇదేమీ పట్టదు. ఎవరో ఒకరు పంటికింద రాయిలా తగిలితే అప్పుడు మొదలవుతాయి వీరి టూ పీస్ దుస్తుల కష్టాలు. ప్రియాంకా చోప్రాకు ఇటువంటి చేదు అనుభవం ఒకటి ఎదురైందట.

మొన్నామధ్య ప్రియాంకా చోప్రా, కరీనాకపూర్ ఇద్దరూ కలిసి ఓ ఫంక్షన్‌కి వెళ్లారట. ఆ పార్టీకి భారతీయ సంప్రదాయాలను తు.చ తప్పకుండా పాటించే ఓ మహిళామణి కూడా వచ్చిందట.

కరీనా, ప్రియాంకలిద్దరూ సదరు మహిళను విష్ చేయగా... కరీనాతో మాత్రమే ప్రేమపూర్వకంగా పలుకరించి, ప్రియాంకను మాత్రం ఎగాదిగా చూసిందట ఆ మహిళ. అంతటితో వదలక... ఏమ్మా, జరిగే పార్టీ ఏంటీ, నువ్వేసుకొచ్చిన డ్రెస్సేంటి. సినిమాల్లో మాదిరిగా ఇక్కడకు వస్తే జనం నవ్వి పోరూ... అని దీర్ఘం తీసిందట.

ఈ పరిణామంతో బిక్కచచ్చిన ప్రియాంకా... వేసుకొచ్చిన పొట్టి దుస్తులనే కాళ్ల దాకా లాగి... లాగి ఓ కుర్చీలో కూలబడిందట. ప్రియాంక దురదృష్టం కాకపోతే... ఆ ప్రక్క కుర్చీలోనే సంప్రదాయ మహిళా వచ్చి కూచుందట. కూచున్నది కాక మధ్యమధ్యలో ఆమెవంక, ఆమె వేసుకొచ్చిన డ్రెస్సు వంక కొరకొర చూస్తూనే ఉందట.

ఆ చూపులను తట్టుకోలేని ప్రియాంక... పొట్టి దుస్తులను కాళ్ల దాకా లాగీ... లాగీ సాగదీసిందట. వేసుకొచ్చిన పొట్టి గౌను కాస్తా ప్రియాంక లాగుడు దెబ్బకు మోకాళ్ల కింది దాకా జారి పొడవు గౌనుగా మారిపోయిందట.