"గాలి" కబుర్లు మంచివేనంటున్న అమృతారావు
|
గాసిప్ కబుర్ల మర్మం గురించి ఓ పిల్ల జర్నలిస్టు అమృతను కదిలిస్తే ఇలా చెప్పుకొచ్చిందట. "ఇరుగమ్మ, పొరుగమ్మల పోచుకోలు కబుర్లు మనకెందుకు అనుకుంటాం కానీ ఈ కబుర్లు ఒత్తిడిని తగ్గిస్తాయట. ఎవరికీ ఇబ్బంది కలిగించని హానిలేని రీతిలో చెప్పుకునే ఇచ్చకాలు ఒకింత సంతోషాన్ని కలిగిస్తాయట. ఓ ఆడా, మగా ఇద్దరూ కలిసి ఓ ప్రక్కకెళ్లి మాట్లాడుకుంటే చాలు... వాళ్లిద్దరి మధ్య ఏదో ఉందని మిగిలిన వ్యక్తులు మాట్లాడుకోవడం సహజమై పోయింది.
వాళ్లిద్దరి మధ్య ఎలాంటి సంభాషణ చోటుచేసుకుందన్న ఆలోచనలను మాటల రూపంలో ఇతరులతో పంచుకోవడం భలే ఆనందాన్నిస్తుందట. ఒత్తిడిని మాయం చేస్తాయట. ముఖ్యంగా సెలబ్రిటీలు, బాస్, సహచరులు, సహోద్యోగులు, బంధుమిత్రులు, ఎవరి గురించైనా ఇటువంటి గాసిప్పులలో చోటు ఉంటుందని తెలుసుకున్నా.
ఇంట్లో, ఆఫీసులో, పార్టీలో, ఫంక్షన్లో ఎక్కడైనా ఈ కబుర్లకు వేదిక చేసుకోవచ్చు. జీవితంలోని కష్టాలను తప్పించుకునే మహత్తర మార్గం గాసిప్. అయితే గాసిప్ మంచిది కావాలే తప్ప ఇతరుల మనోభావాలను దెబ్బ తీసే విధంగా ఉండకూడదు" అని గడగడా చెప్పేసింది అమృత.
