టీవీ సీరియల్స్‌లో నటిస్తే తప్పా..?: నాగార్జున

Publish: Thu, 20 Dec 2007 (16:10 IST) Updated: Thu, 20 Dec 2007 (16:09 IST)

File

FILE

టాలీవుడ్ హాండ్‌సమ్‌గా పేరొందిన నాగార్జున వెండి తెర ప్రేక్షకుల్లో తన కంటూ ప్రత్యేక స్థానాన్ని ఏర్పరుచుకున్నాడు. మాస్ చిత్రం తర్వాత శ్రీరామదాసులో నటించారు. ఇటీవల ఆయన నటించిన చిత్రం డాన్... నాగార్జున కొత్త తరహా గెటప్‌లో నటిస్తున్న ఈ చిత్రంపై భారీ అంచనాలున్నాయి. కీర్తి క్రియేషన్స్ పతాకంపై రూపొందుతున్న ఈ చిత్రం ఎంఎల్ కుమార్ చౌదరి నిర్మాణ సారథ్యంలో చిత్రీకరిస్తున్నారు. అన్ని కార్యక్రమాలు ముగించుకున్న ఈ చిత్రం డిసెంబర్ 20న విడుదలవుతున్న సందర్భంగా యువసామ్రాట్‌తో జరిపిన ఇంటర్వ్యూ..

భారీ అంచనాలతో విడుదలవుతున్న డాన్ చిత్రం కథ ఏంటి..?
హైదరాబాద్ బ్యాక్ డ్రాప్‌లో సాగే ఈ కథలో ఇద్దరు డాన్‌ల మధ్య జరిగే పవర్‌ఫుల్ గేమ్ ఈ చిత్రం. అంతా ఏదో ఇంగ్లీష్ సినిమా చూసినట్లే ఉంటుంది.

లారెన్స్ కూడా మీతో పాటు నటించాడని అంటున్నారు..?
ఎస్.. నాకు తమ్ముడిగా నటించాడు.. అతనికి జోడీగా నిఖిత నటించింది..

ఈ చిత్రంలో మీకు నచ్చిన అంశాలేమిటి...?
యాక్షన్ ప్రధానంగా సాగే ఈ చిత్రంలో సీక్వెల్స్ చెప్పిన విధానం నచ్చింది..

మీ చిత్రాలన్నీ డిసెంబర్‌లోనే విడుదలయ్యాయి.. అలాంటి సెంటిమెంట్ ఏదైనా..?
అందరూ సంక్రాంతికి విడుదల చేయాలనుకుంటుంటారు... అయితే మూడు వారాల పాటు హాలిడేస్ వస్తుంది కనుక ముందుగా డిసెంబర్‌లో విడుదల చేస్తే దాని ప్రభావం సంక్రాంత్రి వరకు ఉంటుందని మా ఉద్దేశ్యం. చిత్రం యావరేజ్ అయినా కలెక్షన్లు బావుంటాయని మా అభిప్రాయం.

ఇలాంటి చిత్రాలు కాకుండా... గదర్, రంగ్‌దే బసంతి వంటి చిత్రాలు చేస్తున్నారా..?
గదర్, రంగ్‌దే బసంతి వంటి చిత్రాలు గొప్ప చిత్రాలు..నాకు అలాంటి చిత్రాలు చేయాలనుంది. అయితే దానికి తగ్గ స్క్రిప్ట్ దొరికితే చేయడానికి సిద్ధంగా ఉన్నాను.

కృష్ణార్జునలో నటిస్తున్నారు కదా.. అందులో మీ పాత్ర..?
కృష్ణుడి పాత్ర... బాగా నచ్చింది... కృష్ణార్జునలో సినిమా అంతా కనిపిస్తాను కూడా...

శేఖర్ కమ్ములతో చిత్రం చేయనున్నట్ల వార్తలు వస్తున్నాయి..?
త్వరలో చేయాలని అనుకుంటున్నాం.. మా బేనర్‌లోనే చేస్తాం...

కార్పరేట్ సంస్థలు నిర్మాణ రంగంలోకి ప్రవేశిస్తున్నందున అన్నపూర్ణ స్టూడియోస్‌ను ఆ దిశగా తీసుకెళ్లే ఆలోచన ఏదైనా ఉందా..?
తీసుకురాకపోతే వెనకబడిపోతాం... అందుకే కదా.. యువసీరియల్‌ను ప్రారంభించాం..

మీరు సీరియల్స్‌లో నటిస్తున్నారా...?
సీరియల్స్‌లో నటిస్తే తప్పా..? సినిమాలు లేక నాగార్జున సీరియల్స్‌లో నటిస్తున్నాడని నేను అనుకోను... అయినా.. ఇప్పుడు వెండి తెర కన్నా.. బుల్లి తెరపై ప్రేక్షకులకు మరింత దగ్గరవ్వచ్చు.

మీ తనయుడు చైతన్య తెరంగేట్రం ఎప్పుడు...?
వాడికీ మధ్యే 22 ఏళ్లు పూర్తయ్యాయి... వస్తాడు.. కాని వాడు ఇది చేస్తాడు.. అది చేస్తాడు అని చెబితే థ్రిల్‌గా ఉండదు...