Nagarjuna| Interview| Naga Chaitanya| Dil Raju| Vasu Varma | మనిషి అనేవాడు ఖాళీగా ఉండకూడదు: నాగార్జున

WD

"మనిషి అనేవాడు తన ఎనర్జీని ఎప్పుడూ ఉపయోగిస్తూ ఉండాలి. ఖాళీగా కూర్చోకూడదు. అందుకే నేను ఎప్పుడూ ఏదో ఒక పనిచేస్తూనే ఉంటాను. నా చుట్టుప్రక్కల వారికి కూడా ఇదే చెబుతుంటాను. మా అబ్బాయికి కూడా ఇదే చెబుతా" అని అంటున్నారు అక్కినేని నాగార్జున.

తన వారసునిగా నాగచైతన్యను సొంత బేనర్‌లో కాకుండా బయట బేనర్‌ దిల్‌రాజుతో సినిమా చేయిస్తున్నారు. ఈ చిత్రాన్ని వాసువర్మ అనే కొత్త దర్శకుడు రూపొందిస్తున్నారు. ఈ చిత్రంపై ఇప్పటికే ప్రేక్షకుల మధ్య భారీ అంచనాలున్నాయి.

తాజాగా "కింగ్" (నాగార్జున) కొత్త చిత్రం ఈనెల 24న ప్రారంభం కానుంది. ఈ సందర్భంగా ఆయన తన చిత్ర విషయాలకంటే తన వారసుని విషయాలను తెలియజేశారు. అందులో కొన్ని మీ కోసం...

ప్రశ్న: నాగచైతన్యను సొంత బేనర్‌లోకాకుండా బయట నిర్మాతలకు అప్పగించడం పట్ల మీ అభిప్రాయం?
జ: నాగచైతన్యను హీరోగా పరిచయం చేయాలని అనుకున్నాం. ఎప్పుడు ఎలాగా? అనే ఆలోచనలో ఉండగానే బయట నిర్మాతలు అడిగారు. అందరికీ చూద్దాం అని చెప్పాను. కానీ ఒక ఆఫర్‌ దగ్గర నేను ఆగిపోయాను. అదే దిల్‌రాజు.

ప్రశ్న: ఆయనతో మీరు సినిమాలు చేయలేదు కదా?
జ : చేయకపోయినా యూత్‌ సినిమాలు తీయడంలో దిల్‌రాజుకు మంచి పట్టుంది. సమర్థవంతంగా సాఫీగా తీయగలడనే నమ్మకముంది. దీనికి ఆయన గత చిత్రాలే నిదర్శనం.

ప్రశ్న: మరి దర్శకుడు కూడా కొత్తవాడే కదా?
జ: అయినా పర్వాలేదు. వాసువర్మ దిల్‌రాజు సినిమాలకు కథలు రాశాడు. అసిస్టెంట్‌ దర్శకుడిగా పనిచేశాడు. ఆర్య ద్వారా సుకుమార్‌ను, బొమ్మరిల్లు ద్వారా భాస్కర్‌ను పరిచయం చేశాడు. టాలెంట్‌ ఉంటే నేనెలా ప్రోత్సహిస్తానో దిల్‌రాజు కూడా అంతే.

ప్రశ్న: దిల్‌రాజు కథకే ప్రాధాన్యత ఇస్తారు. హీరోగా మీ అబ్బాయి ఎలాంటి ప్రిఫరెన్స్‌ ఇస్తారని భావిస్తున్నారు?
జ: స్టార్‌ కొడుకైనా ముందుగా కావాల్సింది కథే. అదే హీరో. నా సినిమాలన్నీ చాలామటుకు కథలే హీరోలు. శివలో కథే హీరో. అది లేకపోతే నేనులేను.

ప్రశ్న: చైతన్య సెషన్ చూశారు కదా.? ప్రేక్షకుడిలా మీకేమైనా లోపాలు కన్పించాయా?
జ: బాగున్నాడు. బాగా చేశాడు. ఈ దశలోనే ఇంతకంటే ఎక్కువ మాట్లాడడం కరెక్ట్ కాదు.

ప్రశ్న: ఈ జనరేషన్‌లో హీరోలు ఏడాదికి, రెండేళ్ళకు ఒక సినిమా చేస్తున్నారు. మరి నాగచైతన్యను ఎలా చేయిస్తారు?
జ: నా అభిప్రాయం ప్రకారం తను సంవత్సరానికి ఖచ్చితంగా మూడు సినిమాలు చెయ్యాలి. నటనను వృత్తిగా స్వీకరించాక వెనుకాడకూడదు. నాకంటే నా వయస్సుకి ఇమేజ్‌కి తగిన కథలు దొరకడం కష్టం. తనకు ఆ ఇబ్బంది లేదు. తను కష్టపడాలి. సంక్రాంతికి, దసరా, దీపావళికి ఒకటి చొప్పున చేయాలి.

ప్రశ్న: కొంతమంది యువ హీరోలు తక్కువగా చిత్రాలు చేయడంపై మీ ఫీలింగ్‌?
జ: అది చాలా తప్పు. మనిషి అనేవాడు ఖాళీగా ఉండకూడదు. ఎనర్జీని ఏదోవిధంగా ఉపయోగించాలి. ఖాళీగా ఉంటే బోర్‌ కొడుతుంది. నేను అలా ఉండను. ఏదో పని చేస్తూనే ఉంటాను. జూనియర్స్‌ కొంచెం కథలపై కుస్తీపడాలి. వచ్చిన అవకాశాన్ని
ఉపయోగించుకోవాలి.

ప్రశ్న: మీ ఇద్దరు కలిసి నటించే అవకాశముందా?
జ: ఇప్పుడే ఏమీ చెప్పలేను. ఏదైనా అద్భుతమైన కథ లభిస్తే అప్పుడు తప్పకుండా చేస్తా.