Kids world | articles | swine flu | cold | fever | body pains | kids | parents | water | స్వైన్ ఫ్లూ : చిన్నారుల కోసం జాగ్రత్తలు..!

FILE

ప్రాణాంతక మహమ్మారి స్వైన్ ఫ్లూ వ్యాధి రోజు రోజుకీ ప్రపంచవ్యాప్తంగా, దేశవ్యాప్తంగా విస్తృతంగా ప్రబలుతోంది. ప్రతిరోజూ ఈ వ్యాధి బారినపడి చాలామంది మృత్యువాత పడుతున్నారు. దీంతో చాలామంది తల్లిదండ్రులు కంగారుపడి.. పిల్లలకు ఏ కాస్త జ్వరం, జలుబు వచ్చినా అవి స్వైన్ ఫ్లూ లక్షణాలేమోనని తీవ్రంగా ఆందోళన చెందుతూ, ఆసుపత్రులకు పరుగులు తీస్తున్నారు.

ఆయాసపడటం లేదా శ్వాస తీసుకోవటంలో ఇబ్బందులు ఎదుర్కోవటం, జ్వరం అనేవి సాధారణ స్వైన్ ఫ్లూ లక్షణాలు. వీటితోపాటు కొంతమందికి ఒళ్లు నొప్పులు, ముక్కు కారటం, దగ్గు, గొంతునొప్పి, తలనొప్పి, వాంతులు, విరేచనాలు.. లాంటి లక్షణాలు కనిపిస్తుంటాయి. అయితే ఈ లక్షణాలు కనిపించినంత మాత్రాన తమ పిల్లలకు స్వైన్ ఫ్లూ వచ్చేసిందని నిర్ధారణకు రావాల్సిన అవసరం లేదు.

ముఖ్యంగా పిల్లలు వేగంగా శ్వాస తీసుకోవటం, నీరు తాగటంలో లేదా ఆహారం మింగటంలో ఇబ్బంది ఏర్పడటం, జ్వరం, తీవ్రంగా దగ్గు లాంటి లక్షణాలు కనిపిస్తేనే స్వైన్ ఫ్లూగా భావించి అవసరమైన వ్యాధి నిర్ధారణ పరీక్షలు చేయించి, తగిన వైద్యాన్ని అందించాల్సి ఉంటుంది.

పిల్లలు ఏ కాస్త నలతగా ఉన్నా, అధిక జ్వరం లేదా శ్వాస తీసుకోవటంలో ఇబ్బందులు లాంటివి లేనట్లయితే.. సాధారణంగా మీ పిల్లలను తీసుకెళ్లే వైద్యులను సంప్రదిస్తే సరిపోతుంది. ఫ్లూ సీజన్‌లో పిల్లలకు జ్వరం రావటం, మందులు వాడినా, వాడకపోయినా ఒకటి రెండు రోజుల్లో తగ్గిపోవటం సహజమే. జ్వరం తగ్గిపోయిన వెంటనే పిల్లలను పాఠశాలలకు పంపకుండా ఒక రోజంతా ఇంట్లోనే పూర్తిగా విశ్రాంతి తీసుకునేలా చేయాలి.

చిన్నారులు దగ్గినప్పుడు లేదా తుమ్మినప్పడు తప్పకుండా టిష్యూ పేపర్లను అడ్డు పెట్టుకోవాలని తల్లిదండ్రులు తెలియజెప్పాలి. అలాగే ఒకసారి వినియోగించిన టిష్యూ పేపర్లను ఇంట్లో ఎక్కడంటే అక్కడ పడవేయకుండా.. వెంటనే వాటిని చెత్తబుట్టలో పారవేయమని చెప్పాలి. అంతేగాకుండా, పిల్లలు తుమ్మిన ప్రతిసారీ వారి చేతులను శుభ్రం చేయడం మంచిది.

ఇక చివరిగా.. చిన్నారులకు ముందుగానే సీజనల్ ఫ్లూ నివారణా వ్యాక్సిన్లను వేయించటం ఉత్తమం. ప్రస్తుతం ఈ వ్యాక్సిన్లు మార్కెట్లో అందుబాటులో ఉన్నాయి కూడా. అలాగే స్వైన్ ఫ్లూ నివారణా వ్యాక్సిన్లు కూడా అక్టోబర్ నెల నుంచి మార్కెట్లోకి విడుదల కానున్నాయి. వెంటనే సాధ్యమైనంత త్వరలో ఈ వ్యాక్సిన్లు అందరికీ అందుబాటులోకి వచ్చే అవకాశం ఉంది.

ఈ వ్యాక్సిన్ పిల్లలకు ఎలా వాడాలంటే.. మొత్తంమీదా రెండు డోసుల వ్యాక్సిన్ అవసరమవుతుంది. మొదటి డోసు తర్వాత మూడు వారాల వ్యవధితో మరో డోసు ఇప్పించాల్సి ఉంటుంది. ఈ వ్యాక్సిన్ ఇచ్చాక స్వైన్ ఫ్లూ కారక హెచ్1ఎన్1 వైరస్ దాడిని ఎదుర్కొనేందుకు శరీరం పూర్తిగా సన్నద్ధం కావాలంటే మరో రెండు వారాల సమయం పడుతుంది. కాబట్టి.. పైన పేర్కొన్న అంశాలను గుర్తుపెట్టుకుని ఏ మాత్రం గాబరా పడకుండా పిల్లల విషయంలో తల్లిదండ్రులు జాగ్రత్తగా ఉంటే సరిపోతుంది.