ఎర్రిపప్ప అంటే.. 'బుజ్జినాన్న' అని అర్థం - మంత్రి నిర్వచనం

'ఎర్రిపప్ప' అనే పదానికి ఏపీ మంత్రి రాష్ట్ర పౌర సరఫరాల శాఖామంత్రి కారుమూరి వెంకట నాగేశ్వర రావు కొత్త అర్థం చెప్పారు. ఎర్రిపప్ప అంటే బుజ్జినాన్న అని అర్థం అని, ఈ మాత్రం పరిజ్ఞానం లేని విపక్ష నేతలు తనప విమర్శలు చేస్తున్నారంటూ మండిపడ్డారు. 

ఈ నెల ఆరో తేదీ శనివారం పశ్చిమ గోదావరి జిల్లాలో తన నియోజకవర్గంలోని తణుకు మండలం వేల్పూరులో ఆయన పర్యటించారు. ఈ సందర్భంగా ఓ రైతు తాము పండించిన ధాన్యం మొలకలొచ్చాయని చెప్పడంతో 'ఎర్రిపప్పు మొలకలొస్తే నేనేం చేస్తాను..' అంటూ ఆగ్రహం వ్యక్తం చేశారు. ఈ వ్యాఖ్యలు వివాదాస్పదం కావడంతోపాటు సోషల్ మీడియాలో ఆయనపై ట్రోలింగ్స్ మొదలయ్యాయి. 

ఈ నేపథ్యంలో ఓ టీవీ చానల్లో మాట్లాడిన కారుమూరి.. తాను చేసిన 'ఎర్రిపప్ప' వ్యాఖ్యలకు వివరణ ఇచ్చారు. తాను రైతులను దుర్భాషలాడలేదని అంటూనే.. 'ఎర్రిపప్ప అంటే బుజ్జినాన్న' అని అర్థమని చెప్పుకొచ్చారు. ఈ వ్యాఖ్యలపై కూడా సోషల్ మీడియా ట్రోల్స్ చేస్తున్నారు. 'అయితే నిన్ను కూడా ఎర్రిపప్ప అనొచ్చు కదా.. కారుమూరి బుజ్జి నాన్న' అని ఒకరంటే.. 151 మంది వైసీపీ ఎమ్మెల్యేలు బుజ్జినాన్న లేనన్నమాట అని మరొకరు కామెంట్ చేశారు.