తల్లిలేని బాలికను గర్భవతిని చేసిన ఫాస్టర్
కోనసీమ జిల్లాలో దారుణం జరిగింది. తల్లిలేని 17 యేళ్ళ బాలికను అత్యాచారం చేసి గర్భవతిని చేశాడు. దీంతో ఆ బాలిక తొమ్మిది నెలలు నిండటంతో గత నెల 5వ తేదీన మగబిడ్డకు జన్మనిచ్చింది. పైగా, తాను చేసిన నేరం బయటపడకుండా ఉండేందుకు వీలుగా ఆ ఫాస్టర్ బిడ్డను మాయం చేశాడు. తాజాగా వెలుగులోకి వచ్చిన ఈ వివరాలను పరిశీలిస్తే,
అంబేద్కర్ కోనసీమ జిల్లా అంబాజీపేట మండలం పుల్లేటికుర్రులో ఫాస్టర్ బెజవాడ హోసన్న అనే ఫాస్టర్ ఓ చర్చిని నిర్వహిస్తున్నాడు. ఈయన వద్దకు వెళ్లేవారిలో ఓ 17 యేళ్ల పాలిక కూడా ఉంది. ఆ బాలికకు మాయమాటలు చెప్పి లోబరుచుకుని, గర్భవతిని చేశాడు. ఈ క్రమంలో ఆ బాలిక గత నెల 5వ తేదీన బిడ్డకు జన్మనిచ్చింది. తాను చేసిన నేరం బయటపడకుండా ఉండేందుకు వీలుగా ఆ బిడ్డను మాయం చేశాడు.
నెల రోజులు గడుస్తున్నా బిడ్డ ఆచూకీ దొరక్కపోవడంతో బాధితురాలు దీనిపై ఫాస్టర్‌ను నిలదీయడంతో అసలు విషయం వెలుగు చూసింది. దీంతో బాధితురాలికి న్యాయం చేయాలని కోరుతూ బాలిక బంధువులు జిల్లా కలెక్టర్‌తో పాటు పోలీసులకు ఫిర్యాదు చేశారు. పుట్టిన బిడ్డ ఏమయ్యాడో దర్యాప్తు చేయాలని వారు కోరుతున్నారు. ఈ ఘటన చుట్టుపక్కల ప్రాంతాల్లో సంచలనంగా మారింది.
