ఇరాన్ దేశంలో 9 మంది పాకిస్థాన్ పౌరుల కాల్చివేత...
ఇరాన్ దేశంలో తొమ్మిది మంది పాకిస్థాన్ కూలీలను గుర్తు తెలియని దుండగులు కాల్చి చంపేశారు. ఇంట్లోకి చొరబడి మరీ ఈ దారుణానికి పాల్పడ్డారు. మరో ముగ్గురు తీవ్రంగా గాయపడ్డారు. శాంతి చర్చల కోసం ఇరాన్ మంత్రి పాకిస్థాన్ దేశ పర్యటనకు వెళ్లేందుకు సిద్ధమైన ఒక్క రోజు ముందు ఈ ఘటన చోటుచేసుకుంది. దీంతో ఇరు దేశాల మధ్య ఉద్రిక్తత నెలకొంది. అయితే, ఈ దుశ్చర్యను విధ్వంసకర శక్తుల పనిగా ఇరాన్ అభివర్ణించింది.
ఈ ఘటనపై పాకిస్థాన్ తీవ్రంగా స్పందించింది. దీనిపై వెంటనే సమగ్ర విచారణ చేపట్టాలని, ఈ దారుణానికి పాల్పడిన వారిని కఠినంగా శిక్షించాలని పాక్ విదేశాంగశాఖ డిమాండ్ చేసింది. ఈ ఘటనకు ఏ గ్రూపు ఇప్పటి వరకు బాధ్యత ప్రకటించలేదు. ఇరాన్ విదేశాంగ మంత్రి హుస్సేన్ చర్చల కోసం పాకిస్థాన్‌లో పర్యటించడానికి ఒక్క రోజు ముందు ఈ ఘటన జరగడం గమనార్హం. ఇరు దేశాల మధ్య సోదర సంబంధాన్ని దెబ్బతీసేందుకు విధ్వంసకర శక్తులు చేస్తున్న ప్రయత్నాలు ఫలించబోవని ఇరాన్ స్పష్టం చేసింది.
మరోవైపు, బలూచిస్థాన్ ప్రావిన్సులోని జైషే మహ్మద్, అల్ అదిల్ ఉగ్ర స్థావరాలను లక్ష్యంగా చేసుకున్న ఇరాన్ ఈ నెల 16న క్షిపణి దాడులకు దిగిన విషయం తెల్సిందే. ఇది పాక్ - ఇరాన్ మధ్య ఉద్రిక్తతలు కారణమైంది. ఇరాన్ దాడిలో ఇద్దరు చిన్నారులు మరణించారని పేర్కొన్న పాకిస్థాన్.. 18న ఇరాన్‌వోని సిస్తాన్ - బలూచిస్థాన్‌లోని ఉగ్రస్థావరాలపై దాడులు చేసింది. ఈ దాడుల్లో 9 మంది మరణించారు. ఈ ఘటనలతో ఇరు దేశాల మధ్య ఉద్రిక్తతలు నెలకొన్న వేళ తాజా ఘటన మరింత అగ్గిరాజేసింది.
