కొత్త వెబ్ సైట్‌ను ప్రారంభించిన టెలికాం రంగ సంస్థ.. మీ పేరు మీద ఎన్ని నెంబర్లున్నాయో..?
టెలికాం రంగ సంస్థ కొత్త వెబ్ సైట్‌ను రూపొందించింది. మనపేరు మీద మనకు తెలియకుండా ఫోన్ నెంబర్లు వుంటే ఈ వెబ్ సైట్ ద్వారా తొలగించే అవకాశం వుంది. ఈ వెబ్‌సైట్ ద్వారా మీ పేరు మీద ఎన్ని ఫోన్ నంబర్లు ఉన్నాయో సులభంగా తెలుసుకోవచ్చు అంటున్నారు టెలికంశాఖ అధికారులు.
ఎవరైనా నంబర్ల గురించి చెక్ చేసుకోవాలనుకుంటే.. వెంటనే http://tafcop.dgtelecom.gov.in అనే వెబ్‌సైట్‌లో మొబైల్‌ నంబరు, దానికి వచ్చే ఓటీపీ నమోదు చేయగానే మన పేరు మీద ఉన్న ఫోన్ నంబర్ల వివరాలన్నీ వస్తాయి.
వాటిలో మనకు అవసరం లేనివి, మనకు తెలియకుండా మన పేరుమీద ఉన్న వాటిని సెలక్ట్‌ చేసి సబ్మిట్‌ చేస్తే.. టెలికం శాఖ చర్యలు తీసుకుంటుంది. ఒకరి పేరు మీద అత్యధికంగా 9 నంబర్లు ఉండేందుకు వీలుంది అని విజయవాడ టెలికం శాఖ డిప్యూటీ డైరెక్టర్ జనరల్‌ రాబర్ట్‌ రవి తెలిపారు.
కొందరి పేర్ల మీద అంతకంటే ఎక్కువ నంబర్లు ఉన్నాయని తమ దృష్టికి వచ్చిందని.. ఈ పరిస్థితిని చక్కదిద్దేందుకు ఈ పోర్టల్‌ను ప్రారంభించామన్నారు. దీనివల్ల అనధికారికంగా వినియోగిస్తున్న నంబర్లకు చెక్ పెట్టొచ్చన్నారు.
ముందుగా తెలుగు రాష్ట్రాల టెలికం సర్కిళ్లలో ఈ సదుపాయాన్ని ప్రారంభించామని.. త్వరలో దేశ వ్యాప్తంగా అందుబాటులోనికి వస్తుందన్నారు. ఎవరికైనా అనుమానం వెంటనే ఇలా చెక్ చేసుకోవచ్చంటున్నారు.
