ఫిబ్రవరి 23న నేతాజీకి చెందిన మరో 25 రహస్య ఫైళ్లు: మహేశ్ శర్మ
నేతాజీ సుభాష్ చంద్రబోస్‌కు సంబంధించిన మరో 25 రహస్య ఫైళ్లను విడుదలయ్యే అవకాశం ఉందని సాంస్కృతిక శాఖ మంత్రి మహేష్ శర్మ వెల్లడించారు. రెండో విడతలో ఫిబ్రవరి 23న సుభాష్‌కు సంబంధించిన మరో 25 రహస్య ఫైళ్లను విడుదల చేయాలని యోచిస్తున్నట్లు తెలిపారు. జనవరి 23న నిర్వహించిన నేతాజీ 119వ జయంతి సందర్భంగా వంద రహస్య ఫైళ్లను డిజిటల్ రూపంలో ప్రధాని నరేంద్ర మోడీ విడుదల చేసిన విషయం తెలిసిందే.
ఇదిలా ఉంటే.. స్వాతంత్ర్య సమరయోధుడు నేతాజీ సుభాష్ చంద్రబోస్‌కు భారతరత్న, ఆయన జయంతి రోజున సెలవు ప్రకటించడంపై పరిశీలించాలని కేంద్ర హోంశాఖను మద్రాసు హైకోర్టు ఆదేశించింది. నేతాజీ సుభాష్ చంద్రబోస్‌కు భారతరత్న ప్రదానం చేయడంతోపాటు ఆయన జయంతి రోజు జనవరి 23న సెలవు ప్రకటించాల్సిందిగా ప్రభుత్వాన్ని ఆదేశించాలని కోరుతూ తమిళనాడు ప్రజా ప్రయోజన వ్యాజ్యాల కేంద్రం నిర్వాహకుడు కేకే రమేశ్‌ న్యాయస్థానంలో వ్యాజ్యం దాఖలుచేశారు.
